Ashwin: ఇవాళ గుజరాతీ ఫుడ్‌ ఫేవరేట్‌.. టీమ్‌ అధికారిక భాషగా తెలుగు: సహచరులతో అశ్విన్‌

ఇంటర్నెట్ డెస్క్: ఐపీఎల్ 2023 సీజన్‌లో (IPL 2023) ఒక్క ప్లేఆఫ్స్ బెర్తు కోసం మూడు జట్లు పోటీలో నిలిచాయి. తొలి మూడు స్థానాల్లో గుజరాత్, చెన్నై, లఖ్‌నవూ ఉండగా.. నాలుగో స్థానం ఎవరిదనేది తేలాల్సి ఉంది. రాయల్ ఛాలెంజర్స్ బెంగళూరు (14 పాయింట్లు), ముంబయి ఇండియన్స్‌ (14 పాయింట్లు), రాజస్థాన్‌ రాయల్స్‌ (14 పాయింట్లు) పోటీ పడుతున్నాయి. రాజస్థాన్‌ తన మ్యాచ్‌ల కోటాను పూర్తి చేసుకుంది. ప్రస్తుతం సన్‌రైజర్స్ హైదరాబాద్‌తో ముంబయి ఆడుతోంది. రాత్రి 7.30 గంటలకు గుజరాత్‌తో బెంగళూరు తలపడనుంది. అయితే, ఆ మ్యాచ్‌కు వరుణుడు అడ్డంకిగా మారే అవకాశం ఉందని తెలుస్తోంది. ఈ క్రమంలో రాజస్థాన్‌ స్పిన్నర్ రవిచంద్రన్ అశ్విన్‌ తన సహచరులను ఉత్సాహపరిచేందుకు చేసిన ట్వీట్‌ నెట్టింట వైరల్‌గా మారింది. 

‘‘ఇవాళ గుజరాత్‌ ఆహారం మనకు ఇష్టమైంది కావాలి. తెలుగు మన జట్టు అధికారిక భాష కావాలని జట్టు సహచరులకు చెప్పేందుకు ప్రయత్నిస్తున్నప్పుడు ఇలా..’’ అని టీమ్‌ సభ్యులతో దిగిన ఫొటోను అశ్విన్‌ షేర్‌ చేశాడు. దీంతో నెటిజన్లు తమ కామెంట్లతో రెచ్చిపోయారు.

* జో రూట్‌ ఫొటోను పెడుతూ.. అతడు కన్విన్స్‌ అయిపోయినట్లు తెలుస్తోంది. 

* మా సన్‌రైజర్స్‌ హైదరాబాద్‌ గురించి సరిగ్గా తెలిసినట్లు లేదు. కలలు కంటున్నారు. ఏదిఏమైనా ఎస్‌ఆర్‌హెచ్‌కే మా సపోర్ట్‌.

* అశ్విన్‌ టైమింగ్‌ అంటే నాకు చాలా ఇష్టం. బౌలింగ్‌, మన్కడింగ్‌, ట్వీటింగ్‌.. ఇలా ఏదైనా సరే భావోద్వేగంతో చేస్తాడు. జై రాయల్స్‌!

* రాజస్థాన్‌ రాయల్స్‌ పూర్తిగా ఎస్‌ఆర్‌హెచ్‌, జీటీ మీద ఆశలు పెట్టుకున్నట్లు ఉంది.