T20 World Cup: రక్షకుడు బుమ్రా

ఓటమి తప్పదనుకున్న మ్యాచ్‌లో భారత్‌ గెలిచిందంటే బుమ్రానే కారణం. కీలక మ్యాచ్‌ల్లో ఎప్పుడైనా వికెట్‌ అత్యావశ్యకం అయినపుడు భారత్‌ చూసేది అతడి వైపే. మిగతా బౌలర్లు పరుగులు కట్టడి చేయలేక, వికెట్లు పడగొట్టలేక మ్యాచ్‌ చేజారేలా కనిపిస్తున్న తరుణంలో అతను ప్రమాదకర రిజ్వాన్‌ను బౌల్డ్‌ చేసిన తీరు గురించి ఎంత చెప్పినా తక్కువే. తక్కువ ఎత్తులో దూసుకొచ్చిన బంతిని రిజ్వాన్‌ స్వీప్‌ చేయాలని చూడగా.. అది అతడికి చిక్కకుండా వెళ్లి ఆఫ్‌ స్టంప్‌ను లేపేసింది. అంతకుముందు కీలకమైన బాబర్‌ అజామ్‌నూ బుమ్రానే పెవిలియన్‌ చేర్చాడు. మొత్తంగా అతను 4 ఓవర్లలో 14 పరుగులే ఇచ్చి 3 వికెట్లు తీశాడు.