CSK: తిరుగులేని చెన్నై.. పన్నెండోసారీ ప్లేఆఫ్స్‌లోకి!

ఇంటర్నెట్ డెస్క్‌: ఇండియన్ ప్రీమియర్‌ లీగ్‌ (IPL)లో చెన్నై సూపర్ కింగ్స్‌ మరో రికార్డు సృష్టించింది. మెగా టోర్నీలో అత్యధిక సార్లు ప్లేఆఫ్స్‌కు చేరిన జట్టుగా ఇప్పటికే రికార్డుకెక్కిన చెన్నై.. ఆ సంఖ్యను మరింత పెంచుకుంది. తాజాగా దిల్లీ క్యాపిటల్స్‌ను ఓడించి మరీ చెన్నై (CSK) ప్లేఆఫ్స్‌ను బెర్తును ఖరారు చేసుకుంది. దీంతో మొత్తం 16 సీజన్లలో 12 సార్లు ప్లేఆఫ్స్‌కు చేరిన ఏకైక జట్టు సీఎస్‌కే. ఆ తర్వాత ముంబయి (ఈ సీజన్‌లో కాకుండా) 9 సార్లు చేరుకుంది. రెండు సీజన్లలో సీఎస్‌కేపై నిషేధం పడిన సంగతి తెలిసిందే. మరో రెండుసార్లు మాత్రమే లీగ్‌ స్టేజ్‌కు పరిమితమైంది. ఇప్పటి వరకు నాలుగు టైటిళ్లను సీఎస్‌కే తన ఖాతాలో వేసుకుంది. మరి ఏ సీజన్‌లో ఎలా అనేది ఓసారి చూద్దాం..

• 2008: ఈ సీజన్‌లో చెన్నై సూపర్‌ కింగ్స్‌ ఫైనల్‌కు దూసుకెళ్లింది. అయితే, అక్కడ రాజస్థాన్‌ రాయల్స్‌ చేతిలో ఓడింది. దీంతో రన్నరప్‌గా నిలిచింది. 
• 2009: సెమీఫైనల్‌ మ్యాచ్‌లో రాయల్‌ ఛాలెంజర్స్ బెంగళూరు చేతిలో చెన్నై ఓడిపోయింది. దీంతో ఫైనల్‌కు చేరి కప్‌ను సాధిద్దామనే కల నెరవేరలేదు. 
• 2010: వరుసగా రెండు సీజన్లలో అదరగొట్టిన సీఎస్‌కే మూడోసారి విజేతగా నిలిచింది. ఈ సీజన్‌ ఫైనల్‌లో ముంబయిని ఓడించి ఛాంపియన్‌గా అవతరించింది. 
• 2011: డిఫెండింగ్‌ ఛాంపియన్‌గా బరిలోకి దిగిన చెన్నై ఈసారి కూడా అదరగొట్టేసి విజేతగా నిలిచింది. ఫైనల్‌లో బెంగళూరును ఓడించి వరుసగా రెండోసారి ఛాంపియన్‌గా చెన్నై అవతరించింది. 
• 2012: హ్యాట్రిక్‌ ఛాంపియన్‌గా నిలుద్దామనే ఆశలకు బ్రేక్‌ పడింది. ఫైనల్‌లో కోల్‌కతా నైట్‌రైడర్స్‌ చేతిలో ఓడిపోయింది. 
• 2013: ఈసారి కూడా రన్నరప్‌గానే టోర్నీని ముగించింది. ఫైనల్‌కు చేరిన చెన్నై.. ముంబయి ఇండియన్స్‌ చేతిలో ఓడిపోయింది. 
• 2014: ఈ సీజన్‌లో ప్లేఆఫ్స్‌కు చేరిన చెన్నై మూడో స్థానంతో సరిపెట్టుకోవాల్సి వచ్చింది. రెండో క్వాలిఫయర్‌లో పంజాబ్‌ చేతిలో ఓడింది.  కానీ, అదే ఏడాదిలో జరిగిన ఛాంపియన్స్‌ లీగ్‌ టీ20 టోర్నీ విజేతగా నిలిచింది.
• 2015: మరోసారి రన్నరప్‌గానే టోర్నీని ముగించింది. ఫైనల్‌ మ్యాచ్‌లో ముంబయి ఇండియన్స్‌ విజయం సాధించింది. దీంతో అత్యధిక సార్లు ప్లేఆఫ్స్‌కు చేరిన జట్టుగా చెన్నై రికార్డు సృష్టించింది. 
• 2018: వరుసగా రెండు సీజన్లలో (2016, 2017) నిషేధానికి గురైన చెన్నై... మళ్లీ పునరాగమనం చేసిన సీజన్‌లోనే ఛాంపియన్‌గా నిలిచింది. ఫైనల్‌లో సన్‌రైజర్స్‌ హైదరాబాద్‌ను ఓడించింది. 
• 2019: ఈ సీజన్‌లోనూ చెన్నై మళ్లీ ఫైనల్‌కు దూసుకెళ్లింది. అయితే, ఫైనల్‌లో ఒక్క పరుగు తేడాతో ముంబయి చేతిలో ఓడిపోయి కప్‌ను చేజార్చుకుంది. 
• 2021: అంతకుముందు ఏడాది (2020 సీజన్‌)లో లీగ్‌ స్టేజ్‌కే పరిమితమైన చెన్నై పుంజుకుంది. ఫైనల్‌లో కోల్‌కతా నైట్‌రైడర్స్‌ను చిత్తు చేసి మరీ నాలుగోసారి ధోనీసేన టైటిల్‌ను సొంతం చేసుకుంది. 
• 2023: గతేడాది పేలవ ప్రదర్శనతో విమర్శలపాలైన చెన్నై.. ఈసారి మాత్రం అదరగొట్టింది. ధోనీకి చివరి సీజన్‌గా భావిస్తున్న సమయంలో ప్లేఆఫ్స్‌కు దూసుకెళ్లింది.