T20 World Cup 2024: నెదర్లాండ్స్‌పై దక్షిణాఫ్రికా విజయం

న్యూయార్క్‌: టీ20 ప్రపంచకప్‌ గ్రూప్‌-డి మ్యాచ్‌లో దక్షిణాఫ్రికా 4 వికెట్ల తేడాతో నెదర్లాండ్స్‌పై కష్టపడి గెలిచింది. శనివారం మొదట బ్యాటింగ్‌కు దిగిన నెదర్లాండ్స్‌ 9 వికెట్లకు 103 పరుగులే చేయగలిగింది. సిబ్రాండ్‌ (40) టాప్‌ స్కోరర్‌. డచ్‌ జట్టు తక్కువ లక్ష్యాన్నే నిర్దేశించినా.. దక్షిణాఫ్రికాకు చెమటలు పట్టించింది. ఛేదనలో దక్షిణాఫ్రికా ఓ దశలో 12 పరుగులకే నాలుగు వికెట్లు కోల్పోయి చిక్కుల్లో పడింది. ఆ దశలో మిల్లర్‌ (59 నాటౌట్‌; 51 బంతుల్లో 3×4, 4×6) జట్టును ఆదుకున్నాడు. స్టబ్స్‌ (33)తో అయిదో వికెట్‌కు 65 పరుగులు జోడించాడు. స్టబ్స్‌ తర్వాత యాన్సెన్‌ (3) కూడా ఔటైనా.. కేశవ్‌ మహరాజ్‌తో కలిసి మిల్లర్‌ పని పూర్తి చేశాడు. దక్షిణాఫ్రికా 18.5 ఓవర్లలో లక్ష్యాన్ని అందుకుంది.