మరొక్క అడుగే

అండర్‌-19 ప్రపంచకప్‌ ఫైనల్లో భారత్‌
ఇంగ్లాండ్‌తో టైటిల్‌ పోరు

పొచెఫ్‌స్ట్రూమ్‌ (దక్షిణాఫ్రికా): మహిళల అండర్‌-19 టీ20 ప్రపంచకప్‌లో భారత్‌ టైటిల్‌కు అడుగు దూరంలో నిలిచింది. శుక్రవారం సెమీస్‌లో 8 వికెట్ల తేడాతో న్యూజిలాండ్‌ను ఓడించి ఫైనల్‌కు దూసుకెళ్లింది. మొదట బ్యాటింగ్‌ చేసిన కివీస్‌ను యువ భారత్‌ 107/9కు పరిమితం చేసింది. బౌలర్ల ధాటికి నిలవలేకపోయిన పోయిన న్యూజిలాండ్‌ క్రమం తప్పకుండా వికెట్లు చేజార్చుకుంది. ‘ప్లేయర్‌ ఆఫ్‌ ద మ్యాచ్‌’ పార్షవి చోప్రా (3/20) ప్రత్యర్థిని కట్టడి చేయడంలో కీలకపాత్ర పోషించింది. ఆమెతో పాటు మన్నత్‌, తితాస్‌, షెఫాలీ, అర్చన తలో వికెట్‌ పడగొట్టారు. జార్జియా (35), ఇసాబెలా (26) పోరాడకపోతే కివీస్‌ ఆమాత్రం స్కోరు కూడా చేసేది కాదు. లక్ష్యాన్ని భారత్‌ 14.2 ఓవర్లలో 2 వికెట్లే కోల్పోయి అలవోకగా ఛేదించింది. ఫామ్‌లో ఉన్న శ్వేత సెహ్రావత్‌ (61 నాటౌట్‌; 45 బంతుల్లో 10×4) మరోసారి అదరగొట్టింది. కెప్టెన్‌ షెఫాలీ వర్మ (10), సౌమ్య తివారి (22) వెనుదిరిగినా శ్వేత ఆఖరి వరకు నిలిచి జట్టును విజయతీరాలకు చేర్చింది. మరో సెమీస్‌లో ఇంగ్లాండ్‌ 3 పరుగుల స్వల్ప తేడాతో ఆస్ట్రేలియాను ఓడించి భారత్‌తో టైటిల్‌ పోరుకు సిద్ధమైంది. మొదట ఇంగ్లాండ్‌ 19.5 ఓవర్లలో 99 పరుగులకే ఆలౌట్‌ కాగా.. ఛేదనలో ఆసీస్‌ 18.4 ఓవర్లలో 96 పరుగులకే కుప్పకూలింది. ఆదివారం ఫైనల్‌ జరుగుతుంది.