ఆ పిచ్‌ గురించి క్యురేటరే చెప్పాలి

లఖ్‌నవూ: భారత్‌-న్యూజిలాండ్‌ మధ్య రెండో టీ20కి ఆతిథ్యం ఇచ్చిన లఖ్‌నవూలోని ఏకనా పిచ్‌ గురించి క్యురేటరే సరైన సమాధానం చెప్పగలడని టీమ్‌ఇండియా బౌలింగ్‌ కోచ్‌ పరాస్‌ మాంబ్రె అన్నాడు. విపరీతంగా బంతి స్పిన్‌ తిరిగిన ఈ పిచ్‌పై రెండు జట్ల బ్యాటర్లు స్కోరు చేసేందుకు చాలా కష్టపడిన నేపథ్యంలో అతడిలా అన్నాడు. ‘‘ఏకనా పిచ్‌పై క్యురేటరే స్పందించాలి. రెండు జట్లకు ఈ పిచ్‌ సవాల్‌ విసిరింది. అదృష్టవశాత్తూ ఆఖర్లో భారత్‌ మ్యాచ్‌పై నియంత్రణ సాధించింది. మొదట ఈ పిచ్‌ను చూసినప్పుడు ఎండినట్లు కనిపించింది. మధ్యలో కొంచెం గడ్డి కూడా ఉంది. మ్యాచ్‌ రోజు మాత్రం మొత్తం మారిపోయింది. బంతి అనూహ్యంగా తిరిగింది’’ అని మాంబ్రె అన్నాడు.