క్రికెట్‌కు ఫించ్‌ గుడ్‌బై

మెల్‌బోర్న్‌: ఆస్ట్రేలియా టీ20 కెప్టెన్‌ ఆరోన్‌ ఫించ్‌ అంతర్జాతీయ క్రికెట్‌కు వీడ్కోలు చెప్పాడు. 36 ఏళ్ల ఫించ్‌.. ఆట నుంచి రిటైరవుతున్నట్లు మంగళవారం ప్రకటించాడు. అయితే బిగ్‌బాష్‌లో లీగ్‌లో అతడు రెనెగేడ్స్‌ తరఫున కొనసాగుతాడు. ప్రపంచవ్యాప్తంగా ఇతర టీ20 లీగ్‌లలో ఆడే అంశాన్ని కూడా పరిశీలిస్తాడు. ఫించ్‌ రిటైర్మెంట్‌ ఊహించిందే. అతడు చివరగా 2018లో టెస్టు మ్యాచ్‌ ఆడాడు. పేలవ ఫామ్‌ నేపథ్యంలో ఫించ్‌ నిరుడు వన్డే క్రికెట్‌ నుంచి రిటైరయ్యాడు. అతడు 76 టీ20ల్లో ఆస్ట్రేలియాకు నాయకత్వం వహించాడు. ఇది ప్రపంచ రికార్డు. అతడు 103 టీ20ల్లో 34.28 సగటుతో 3120 పరుగులు చేశాడు. 146 వన్డేల్లో 38.89 సగటుతో 5406 పరుగులు సాధించాడు.