సింధు శుభారంభం

గాయత్రి జంట ఔట్‌
వైదొలిగిన సాత్విక్‌ జోడీ
స్పెయిన్‌ ఓపెన్‌ బ్యాడ్మింటన్‌

మాడ్రిడ్‌: స్పెయిన్‌ ఓపెన్‌ బ్యాడ్మింటన్‌ టోర్నీలో పి.వి.సింధు శుభారంభం చేసింది. బుధవారం మహిళల సింగిల్స్‌ తొలి రౌండ్లో రెండో సీడ్‌ సింధు 21-10, 21-14తో స్టాడెల్‌మాన్‌ (స్విట్జర్లాండ్‌)ను ఓడించింది. తొలి గేమ్‌ ఆరంభం నుంచి దూకుడుగా ఆడిన సింధు విరామ సమయానికి 11-5తో ఆధిక్యంలో నిలిచింది. ఆ తర్వాతా జోరు ప్రదర్శించిన సింధు తేలిగ్గా తొలి గేమ్‌ నెగ్గింది. రెండో గేమ్‌లో స్టాడెల్‌మాన్‌ భారత షట్లర్‌కు గట్టిపోటీ ఇచ్చింది. ఒక దశలో 11-11తో స్కోరు సమమయ్యాయి. పుంజుకున్న సింధు ప్రత్యర్థికి ఎలాంటి అవకాశం ఇవ్వలేదు. 18-13తో ఆధిక్యంలోకి వెళ్లిన ఆమె అదే ఊపులో గేమ్‌తో పాటు మ్యాచ్‌ నెగ్గింది. మరోవైపు ఆరో సీడ్‌ లీ మిచెల్‌ (కెనడా)కు ఆకర్షి కశ్యప్‌ షాక్‌ ఇచ్చింది. ఆమె 12-21, 21-15, 21-18తో మిచెల్‌ను ఓడించింది. అస్మిత 21-12, 22-20తో లియోనైస్‌ (ఫ్రాన్స్‌)పై.. మాల్విక 21-19, 16-21, 21-9తో కిసోనా (అమెరికా)పై నెగ్గారు. పురుషుల సింగిల్స్‌లో శ్రీకాంత్‌, సాయిప్రణీత్‌, ప్రియాంశు రజావత్‌, కిరణ్‌ జార్జ్‌ ముందంజ వేశారు. శ్రీకాంత్‌ 21-11, 25-27, 23-21తో థమాసిన్‌ (థాయ్‌లాండ్‌)పై.. సాయిప్రణీత్‌ 21-16, 18-21, 21-12తో జాన్‌ (చెక్‌ రిపబ్లిక్‌)పై నెగ్గగా.. ప్రియాంశు 18-21, 21-16, 21-11తో స్వెండ్‌సెన్‌ (డెన్మార్క్‌)ను ఓడించాడు. కిరణ్‌ 21-16, 21-14తో సహచరుడు మిథున్‌పై నెగ్గాడు. మహిళల డబుల్స్‌లో గాయత్రి-త్రీసా జాలీకి చుక్కెదురైంది. తొలి రౌండ్లో గాయత్రి జంట 18-21, 16-21తో మియారా-అయాకో (జపాన్‌) జోడీ చేతిలో ఓడింది. ఇటీవలే స్విస్‌ ఓపెన్‌ నెగ్గిన సాత్విక్‌ సాయిరాజ్‌-చిరాగ్‌శెట్టి తొలి రౌండ్లోనే నిష్క్రమించారు. అయాటో-యుటా (జపాన్‌)తో పోరులో తొలి గేమ్‌లో 9-11తో వెనుకబడి ఉన్న సమయంలో సాత్విక్‌కు గాయం కావడంతో భారత జంట పోటీ నుంచి తప్పుకుంది.