క్వార్టర్స్‌లో సింధు, శ్రీకాంత్‌

మాడ్రిడ్‌: స్పెయిన్‌ మాస్టర్స్‌ బ్యాడ్మింటన్‌ టోర్నీలో పి.వి.సింధు, కిదాంబి శ్రీకాంత్‌లు క్వార్టర్‌ఫైనల్లోకి దూసుకెళ్లారు. గురువారం మహిళల సింగిల్స్‌ ప్రిక్వార్టర్స్‌లో సింధు 21-14, 21-16తో కుసుమ వర్దని (ఇండోనేసియా)పై నెగ్గింది. గాయం నుంచి కోలుకున్నాక ఫామ్‌ను అందుకోలేక ఇబ్బంది పడుతున్న సింధు క్వార్టర్స్‌ చేరుకోవడం ఈ ఏడాది ఇదే తొలిసారి. మ్యాచ్‌లో ఆరంభం నుంచి దూకుడుగా ఆడిన ఆమె మొదటి గేమ్‌ను ఏకపక్షంగా ముగించింది. 8-1తో మొదలుపెట్టిన ఆమె చూస్తుండగానే 21-14తో తొలి గేమ్‌ గెలుచుకుంది. రెండో గేమ్‌ ప్రథమార్ధం వరకు హోరాహోరీగా సాగింది. సింధు, కుసుమ 8 పాయింట్ల వరకు నువ్వానేనా అన్నట్లు తలపడ్డారు. 15-13 స్కోరు వరకు ప్రత్యర్థి పోటీలో నిలిచింది. ఆ తర్వాత గేరు మార్చిన సింధు వరుసగా 4 పాయింట్లతో ముందంజ వేసింది. 19-13తో గేమ్‌కు చేరువైన సింధు.. ప్రత్యర్థికి ఎలాంటి అవకాశం ఇవ్వకుండా 21-16తో రెండో గేమ్‌ను, మ్యాచ్‌ను సొంతం చేసుకుంది. ఆకర్షి కశ్యప్‌ 13-21, 8-21తో నట్సుకీ (జపాన్‌) చేతిలో.. అస్మిత 15-21, 15-21తో యెజియా (ఇండోనేషియా) చేతిలో ఓడారు. మారిన్‌ (స్పెయిన్‌)తో పోరును మాల్విక వాకోవర్‌ ఇచ్చింది. పురుషుల సింగిల్స్‌ ప్రిక్వార్టర్స్‌లో శ్రీకాంత్‌ 21-15, 21-12తో సహచర ఆటగాడు సాయి ప్రణీత్‌పై గెలుపొందాడు. ప్రియాంశు రజావత్‌ 14-21, 15-21తో  పొపోవ్‌ (ఫ్రాన్స్‌) చేతిలో.. కిరణ్‌ జార్జ్‌ 17-21, 12-21తో మాగ్నస్‌ జొహానెసెన్‌ (డెన్మార్క్‌) చేతిలో.. సమీర్‌వర్మ 15-21, 14-21తో సనెయమా (జపాన్‌) చేతిలో ఓడారు. మహిళల డబుల్స్‌ ప్రిక్వార్టర్స్‌లో సిక్కిరెడ్డి-ఆర్తి 12-21, 13-21తో హిరోకమి-యునా కాటో (జపాన్‌) చేతిలో తలొంచగా.. పురుషుల డబుల్స్‌ ప్రిక్వార్టర్స్‌లో అర్జున్‌-ధ్రువ్‌ 16-21, 20-22తో మెజాకి-నిషిడా (జపాన్‌) చేతిలో ఓడారు.