Praggnanandhaa: కార్ల్‌సన్‌ అజేయుడేం కాదు

కోల్‌కతా: ప్రపంచకప్‌ విజేత, నార్వే స్టార్‌ మాగ్నస్‌ కార్ల్‌సన్‌ అజేయుడేం  కాదని భారత చెస్‌ సంచలనం ప్రజ్ఞానంద అన్నాడు. ‘‘కార్ల్‌సన్‌ కచ్చితంగా బలమైన ఆటగాడు. కానీ అతడూ మ్యాచ్‌లు ఓడిపోతాడు. మాగ్నస్‌ అజేయుడేం  కాదు. మానసికంగా, శారీరకంగా బలంగా ఉన్నాడు కాబట్టి ఎక్కువ ఓటములు లేకుండా స్థిరంగా విజయాలు సాధిస్తున్నాడు’’ అని ప్రజ్ఞానంద పేర్కొన్నాడు. ప్రపంచకప్‌లో రన్నరప్‌గా నిలవడం తన కెరీర్‌లో తొలి అడుగు అని సాధించాల్సింది చాలా ఉందన్నాడు. ‘‘చెస్‌లో నేనింకా సాధించాల్సింది చాలా ఉంది. ప్రపంచకప్‌లో ప్రదర్శన తొలి అడుగు మాత్రమే. ప్రపంచ ఛాంపియన్‌షిప్‌ నెగ్గాలంటే మానసికంగా, శారీరకంగా బలంగా ఉండాలి. నా వరకు నేను బ్యాడ్మింటన్‌ ఆడడం, వాకింగ్‌ చేయడం ద్వారా శరీరాన్ని, మనసుని ఉల్లాసంగా ఉంచుతాను’’ అని ప్రజ్ఞానంద చెప్పాడు.