Ravichandran Ashwin: ఆ రోజు కోహ్లి, రోహిత్‌ ఏడ్చారు

చెన్నై: ప్రపంచకప్‌ ఫైనల్లో ఆస్ట్రేలియా చేతిలో ఓడిన తర్వాత విరాట్‌ కోహ్లి, రోహిత్‌శర్మ డ్రెస్సింగ్‌రూమ్‌లో ఏడ్చారని ఆఫ్‌ స్పిన్నర్‌ రవిచంద్రన్‌ అశ్విన్‌(Ravichandran Ashwin) చెప్పాడు. ‘‘ప్రపంచకప్‌ ఫైనల్లో ఆస్ట్రేలియా చేతిలో పరాజయం తర్వాత ప్రతి ఒక్కరూ చాలా బాధపడ్డాం. రోహిత్‌, కోహ్లి కన్నీళ్లు పెట్టుకున్నారు. అయితే టీమ్‌ఇండియాకు ఎంతో అనుభవం ఉంది. మున్ముందు ఏం చేయాలో అందరికి తెలుసు’’ అని అన్నాడు. రోహిత్‌ కెప్టెన్సీ గురించి మాట్లాడుతూ.. ‘‘ప్రతి ఒక్కరూ ధోనిని ఉత్తమ కెప్టెన్‌గా పేర్కొంటారు. అయితే రోహిత్‌ కూడా ఈ విషయంలో తక్కువేం కాదు. అతడికి జట్టులో ప్రతి ఒక్కరి గురించి అవగాహన ఉంది. అందరి ఇష్టాయిష్టాలు తెలుసు. ప్రతి ఒక్కరితో సమన్వయం కూడా ఉంది. అందరినీ అర్థం చేసుకోవడానికి ప్రయత్నిస్తాడు’’ అని అశ్విన్‌ చెప్పాడు.