U19 World Cup Final : మనోడే దెబ్బ కొట్టాడు

ప్రపంచకప్‌ ఫైనల్లో టీమ్‌ఇండియా ఓటమికి హర్జాస్‌ సింగ్‌ ఓ ప్రధాన కారణం. బ్యాటింగ్‌లో అర్ధశతకంతో జట్టుకు మెరుగైన స్కోరు అందించాడు. అయితే ఈ హర్జాస్‌ సింగ్‌ భారత సంతతికి చెందినవాడే. అతని మూలాలు పంజాబ్‌లోని చండీగఢ్‌లో ఉన్నాయి. హర్జాస్‌ తండ్రి ఇందర్‌జిత్‌ సింగ్‌ రాష్ట్ర బాక్సింగ్‌ ఛాంపియన్‌. తల్లి అవిందర్‌ కౌర్‌ రాష్ట్రస్థాయి లాంగ్‌జంప్‌ అథ్లెట్‌. ఇందర్‌జిత్‌ కుటుంబం 2000లో ఆస్ట్రేలియాకు వలస వెళ్లింది. 2005లో సిడ్నీలో హర్జాస్‌ పుట్టాడు. రెవెస్బీ వర్కర్స్‌ క్రికెట్‌ క్లబ్‌లో 8 ఏళ్ల వయసులో కెరీర్‌ ప్రారంభించాడు. ఈ ప్రపంచకప్‌లో ఫైనల్‌ ముందు వరకూ అతను గొప్పగా రాణించింది లేదు. ఈ మ్యాచ్‌కు ముందు అతని అత్యధిక స్కోరు 17 పరుగులే. ఆరు ఇన్నింగ్స్‌ల్లో కలిపి 49 పరుగులే చేశాడు. కానీ కీలకమైన పోరులో మాత్రం 55 పరుగుల ఇన్నింగ్స్‌తో భారత్‌ను దెబ్బకొట్టాడు. ఎడమ చేతి వాటం బ్యాటర్‌ అయిన అతను కుడి చేతి వాటం పేసర్‌ కూడా. శ్రీలంకపై ఓ వికెట్‌ కూడా సాధించాడు. ఇప్పటికీ అతని బంధువులు పంజాబ్‌లో ఉన్నారు. చివరగా అతను 2015లో భారత్‌కు వచ్చాడు.