టీ20 సిరీస్‌ ఆసీస్‌దే

ఆక్లాండ్‌: న్యూజిలాండ్‌తో టీ20 సిరీస్‌లో ఆస్ట్రేలియా పైచేయి సాధించింది. వరుసగా రెండు మ్యాచ్‌ల్లో నెగ్గి మరో టీ20 మిగిలుండగానే సిరీస్‌ను సొంతం చేసుకుంది. శుక్రవారం రెండో టీ20లో ఆసీస్‌ 72 పరుగుల తేడాతో నెగ్గింది. మొదట ఆసీస్‌ 19.5 ఓవర్లలో 174 పరుగులకు ఆలౌటైంది. ట్రావిస్‌ హెడ్‌ (45; 22 బంతుల్లో 2×4, 5×6), కెప్టెన్‌ మిచెల్‌ మార్ష్‌ (26; 21 బంతుల్లో 1×4, 2×6), ‘మ్యాన్‌ ఆఫ్‌ ద మ్యాచ్‌’ పాట్‌ కమిన్స్‌ (28; 22 బంతుల్లో 5×4) రాణించి జట్టుకు గౌరవప్రదమైన స్కోరు అందించారు. కివీస్‌ బౌలర్లలో లాకీ ఫెర్గూసన్‌ (4/12), ఆడమ్‌ మిల్నే (2/40), బెన్‌ సియర్స్‌ (2/29), మిచెల్‌ సాంట్నర్‌ (2/35) మెరిశారు. అనంతరం కివీస్‌ 17 ఓవర్లలో 102 పరుగులకే కుప్పకూలింది. గ్లెన్‌ ఫిలిప్స్‌ (42; 35 బంతుల్లో 3×4, 2×6) పోరాడినా ఫలితం లేకపోయింది. ఆడమ్‌ జంపా (4/34), నాథన్‌ ఎలిస్‌ (2/16) ఆ జట్టును దెబ్బ తీశారు. చివరి టీ20 ఆదివారం జరగనుంది.