ఆమీర్‌ను కలిసిన సచిన్‌

శ్రీనగర్‌: రెండు చేతులు లేకపోయినా క్రికెట్‌ ఆడుతూ అందరికి స్ఫూర్తిగా నిలిచిన జమ్ము కశ్మీర్‌ కుర్రాడు ఆమీర్‌ హుస్సేన్‌ను దిగ్గజ క్రికెటర్‌ సచిన్‌ తెందుల్కర్‌ కలిశాడు. కశ్మీర్‌ పర్యటనలో ఉన్న సచిన్‌.. పారా క్రికెటర్‌ ఆమీర్‌ను కలిసిన వీడియోను ఇన్‌స్టాగ్రామ్‌లో పంచుకున్నాడు. ‘‘ఆమీర్‌ నిజమైన హీరో. ఇలాగే అందరికి స్ఫూర్తి ఇవ్వాలి. అతడిని కలవడం చాలా సంతోషంగా ఉంది’’ అని తెందుల్కర్‌ వ్యాఖ్య జోడించాడు. ఆమీర్‌తో చాలాసేపు ముచ్చటించిన సచిన్‌.. ఆటోగ్రాఫ్‌ చేసిన బ్యాట్‌ను బహుమతిగా ఇచ్చాడు. చేతులు లేకుండా తాను ఎలా ఆడతానో సచిన్‌కు ఆమీర్‌ చూపించాడు. ఇటీవల ఆమీర్‌ క్రికెట్‌ ఆడుతున్న వీడియో సామాజిక మాధ్యమాల్లో విస్తృతం కావడంతో అతడిని కలవాలని ఉందని తెందుల్కర్‌ గతంలో తెలిపాడు.