భారత్‌-పాక్‌ సిరీస్‌.. ఆసీస్‌ ఆసక్తి

మెల్‌బోర్న్‌: భారత్‌, పాకిస్థాన్‌ మధ్య ద్వైపాక్షిక టెస్టు సిరీస్‌కు ఆతిథ్యమివ్వడానికి ఆస్ట్రేలియా మరోసారి ఆసక్తి వ్యక్తం చేసింది. ఒకవేళ ఈ రెండు దాయాది దేశాలు తటస్థ వేదికలో ఆడాలనుకుంటే, సిరీస్‌ నిర్వహణకు ఆసీస్‌ సిద్ధంగా ఉంది. ఇరు దేశాల మధ్య ఉద్రిక్త పరిస్థితుల కారణంగా 2012-13 నుంచి భారత్‌, పాక్‌ ద్వైపాక్షిక సిరీస్‌లు ఆడటం లేదు. కేవలం ఐసీసీ టోర్నీల్లోనే ఈ రెండు జట్లు తలపడుతున్నాయి. ఈ ఏడాది నవంబర్‌లో పాక్‌, భారత్‌.. ఆస్ట్రేలియాలో పర్యటించనున్నాయి. మొదట పరిమిత ఓవర్ల సిరీస్‌ కోసం పాకిస్థాన్‌.. ఆ తర్వాత టెస్టుల కోసం భారత్‌ అక్కడికి వెళ్తుంది. ‘‘ఎంసీజీలో భారత్‌, పాక్‌ పోరు అంటే ఎంతో ప్రత్యేకమైన సందర్భంగా నిలిచిపోతుంది. కేవలం మ్యాచ్‌ మాత్రమే కాదు అంతకంటే గొప్పగా ఉంటుంది. అందుకే ప్రజలు ఆ రెండు జట్ల మధ్య మ్యాచ్‌ను చూడాలనుకుంటారు. ఒకవేళ అవకాశం వస్తే భారత్‌, పాక్‌ సిరీస్‌ నిర్వహణకు సిద్ధంగా ఉన్నాం’’ అని క్రికెట్‌ ఆస్ట్రేలియా సీఈవో నిక్‌ హాక్‌లీ పేర్కొన్నాడు.