సింధు శుభారంభం

మాడ్రిడ్‌: మాడ్రిడ్‌ స్పెయిన్‌ మాస్టర్స్‌ బ్యాడ్మింటన్‌ టోర్నీలో భారత స్టార్‌ షట్లర్‌ పీవీ సింధు శుభారంభం చేసింది. బుధవారం మహిళల సింగిల్స్‌ తొలి రౌండ్లో రెండో సీడ్‌ సింధు 21-16, 21-12 తేడాతో వెన్‌ యు జంగ్‌ (కెనడా)పై విజయం సాధించింది. 30 నిమిషాల్లో ముగిసిన ఈ మ్యాచ్‌లో వెన్‌ నుంచి పోటీ ఎదురైనా ఆమె తట్టుకుని నిలబడింది. తొలి గేమ్‌లో 5-7తో వెనుకబడ్డ సింధు.. ఆ తర్వాత అద్భుతంగా పుంజుకుంది.  14-14తో పోరు రసవత్తరంగా మారిన దశలో.. వరుసగా నాలుగు పాయింట్లు గెలిచి ఆధిపత్యం ప్రదర్శించింది. అదే ఊపులో గేమ్‌ సొంతం చేసుకుంది. రెండో గేమ్‌లోనూ మొదట ఇద్దరు క్రీడాకారిణులు పోటాపోటీగా తలపడ్డారు. కానీ 4-4తో స్కోరు సమమైన తర్వాత ఇక సింధు ఆగలేదు. షటిల్‌పై పూర్తి నియంత్రణతో ఆధిపత్యం ప్రదర్శించింది. ప్రత్యర్థిని ఒత్తిడిలోకి నెట్టి, చూస్తుండగానే గేమ్‌తో పాటు మ్యాచ్‌నూ ముగించింది. రెండో రౌండ్లో హువాంగ్‌ (చైనీస్‌ తైపీ)తో సింధు తలపడుతుంది. మరోవైపు అశ్మిత 13-21, 11-21తో రచనోక్‌ (థాయ్‌లాండ్‌) చేతిలో, సతీష్‌ 15-21, 19-21తో హెంగ్‌ (సింగపూర్‌) చేతిలో ఓడిపోయారు. మిక్స్‌డ్‌ డబుల్స్‌లో సతీష్‌-ఆద్య జోడీ 18-21, 14-21తో రినోవ్‌-హనింగ్‌త్యాస్‌ (ఇండోనేసియా) చేతిలో ఓడింది