పోరాడి ఓడిన సింధు

సెమీస్‌లో సిక్కి జోడీ

మాడ్రిడ్‌: మాడ్రిడ్‌ స్పెయిన్‌ మాస్టర్స్‌ సూపర్‌ 300 బ్యాడ్మింటన్‌ టోర్నీలో శుక్రవారం భారత్‌కు మిశ్రమ ఫలితాలు వచ్చాయి. మిక్స్‌డ్‌ డబుల్స్‌లో దంపతులు సిక్కిరెడ్డి- సుమీత్‌ రెడ్డి సెమీస్‌ చేరారు. మహిళల సింగిల్స్‌లో స్టార్‌ షట్లర్‌ పీవీ సింధు ఓడిపోయింది. రెండో సీడ్‌ సింధు క్వార్టర్స్‌లో 26-24, 17-21, 20-22 తేడాతో ఆరో సీడ్‌ సుపనిద (థాయ్‌లాండ్‌) చేతిలో పోరాడి ఓడింది. తొలి గేమ్‌లో 4-8తో వెనుకబడ్డ దశ నుంచి అద్భుత పోరాటంతో పుంజుకున్న సింధు హోరాహోరీ పోరులో పైచేయి సాధించింది. ప్రత్యర్థి నుంచి ఆమెకు కఠిన సవాలు ఎదురైంది. ఎవరూ తగ్గకపోవడంతో స్కోరు 24-24తో సమమైంది. ఆ దశలో వరుసగా రెండు పాయింట్లతో సింధు నెగ్గింది. కానీ రెండో గేమ్‌లో అనవసర తప్పిదాలతో ఆమె ఓడిపోయింది. మూడో గేమ్‌లో 10-5తో ఆధిక్యంలో నిలిచినప్పటికీ సింధు అవకాశాన్ని చేజార్చుకుంది. చివరి వరకూ ప్రయత్నించినా.. ఆఖర్లో తప్పిదాలతో ఓటమి మూటగట్టుకుంది. మరోవైపు మిక్స్‌డ్‌ డబుల్స్‌లో క్వార్టర్స్‌లో సిక్కి- సుమీత్‌ జోడీ 14-21, 21-11, 21-17 తేడాతో నాలుగో సీడ్‌ లీసా- రెహాన్‌ (ఇండోనేసియా)పై విజయం సాధించింది. తొలి గేమ్‌లో ఓడినప్పటికీ సిక్కి ద్వయం గొప్పగా పుంజుకుంది. రెండో గేమ్‌ నుంచి అత్యుత్తమ ఆటతీరుతో సాగింది. స్మాష్‌లు, ర్యాలీలతో ఆకట్టుకుంది. 3-2తో ఆధిక్యంలో నిలిచిన తర్వాత ఎక్కడా తగ్గలేదు. ఆధిపత్యం కొనసాగించి గేమ్‌ దక్కించుకుంది. మూడో గేమ్‌లో ఓ దశలో 5-10తో వెనకబడ్డప్పటికీ సిక్కి జోడీ పట్టు వదల్లేదు. 13-13తో ప్రత్యర్థిని అందుకున్న ఈ జంట అదే ఊపులో గేమ్‌తో పాటు మ్యాచ్‌నూ సొంతం చేసుకుంది. మహిళల డబుల్స్‌లో మూడో సీడ్‌ తనీష- అశ్విని జంట 13-21, 19-21తో ఆరో సీడ్‌ లీ చియా- తెంగ్‌ చున్‌ (చైనీస్‌ తైపీ) చేతిలో ఓడింది.