ఇదే నా అత్యుత్తమ చివరి ఓవర్‌

జైపుర్‌: ఇప్పటిదాకా తాను వేసిన ఇన్నింగ్స్‌ చివరి ఓవర్లలో గురువారం రాత్రి దిల్లీ క్యాపిటల్స్‌ మీద వేసిందే ఉత్తమమైందని రాజస్థాన్‌ రాయల్స్‌ పేసర్‌ అవేష్‌ ఖాన్‌ అభిప్రాయపడ్డాడు. 186 పరుగుల లక్ష్యంతో బరిలోకి దిగిన డీసీకి చివరి ఓవర్లో 17 పరుగులు అవసరం కాగా.. స్టబ్స్‌, అక్షర్‌ పటేల్‌ జోరుమీదుండడంతో రాజస్థాన్‌కు కష్టమే అనిపించింది. కానీ కట్టుదిట్టంగా బంతులేసిన అవేష్‌.. చివరి ఓవర్లో కేవలం 4 పరుగులే ఇచ్చి జట్టును గెలిపించాడు. ఈ ప్రదర్శన గురించి అవేష్‌ మాట్లాడుతూ.. ‘‘నేను చివరి ఓవర్‌ ఇలా వేయడం ఇదే తొలిసారి కాదు. అయితే ప్రణాళికల్ని సరిగ్గా అమలు చేయడంలో ఇదే నా అత్యుత్తమ చివరి ఓవర్‌. నేను అనుకున్న చోట బంతులు పడ్డాయి’’ అని చెప్పాడు.