సాత్విక్‌ జోడీ సైనాను దాటి!

దిల్లీ: భారత బ్యాడ్మింటన్‌ స్టార్లు జోడీ సాత్విక్‌ సాయిరాజ్‌-చిరాగ్‌శెట్టి గొప్ప ఘనత సాధించారు. దిగ్గజ షట్లర్‌ సైనా నెహ్వాల్‌ను అధిగమిస్తూ భారత్‌ తరఫున ఎక్కువ వారాలు నంబర్‌వన్‌గా జోడీగా నిలిచారు. 2015లో నంబర్‌వన్‌ ర్యాంకు సాధించిన సైనా 9 వారాలు (ఆగస్టు 18-అక్టోబర్‌ 20) ఆ స్థానంలో కొనసాగింది. 2024 జనవరి 23న టాప్‌ ర్యాంకు సొంతం చేసుకున్న సాత్విక్‌ ద్వయం ఇప్పటికి పది వారాలు పూర్తి చేసుకుంది. హాంగ్జౌ ఆసియా క్రీడల్లో స్వర్ణం గెలిచిన తర్వాత 2023 అక్టోబర్‌లో తొలిసారి ఈ ర్యాంకు సాధించిన సాత్విక్‌ జంట.. ఆ తర్వాత కోల్పోయింది. ఆపై మలేసియా ఓపెన్‌, ఇండియా ఓపెన్లో సత్తా చాటి మళ్లీ ఈ ఏడాది ఆరంభంలో అగ్రస్థానానికి చేరుకుంది.