ఫుట్‌బాల్‌ సమాఖ్య సభ్యుడి అరెస్టు

పనాజి: ఇద్దరు క్రీడాకారిణులపై భౌతిక దాడికి పాల్పడినందుకు అఖిల భారత ఫుట్‌బాల్‌ సమాఖ్య (ఏఐఎఫ్‌ఎఫ్‌) ఎగ్జిక్యూటివ్‌ కమిటీ సభ్యుడు దీపక్‌శర్మను గోవా పోలీసులు శనివారం అరెస్టు చేశారు. హిమాచల్‌ ప్రదేశ్‌ ఫుట్‌బాల్‌ సంఘానికి దీపక్‌ కార్యదర్శి కూడా. ఇండియన్‌ వుమెన్స్‌ ఫుట్‌బాల్‌ (ఐడబ్ల్యూఎల్‌) రెండో డివిజన్‌ లీగ్‌లో పాల్గొనేందుకు ఖాడ్‌ ఎఫ్‌సీ (హిమాచల్‌ ప్రదేశ్‌) ఫుట్‌బాలర్లు గోవా వచ్చారు. మార్చి 28న రాత్రి ఖాడ్‌ ఎఫ్‌సీ యజమాని దీపక్‌ అమ్మాయిల గదిలోకి చొరబడి క్రీడాకారిణులపై భౌతికంగా దాడికి పాల్పడ్డాడన్నది ఆరోపణ. ‘‘అధికారంగా ఫిర్యాదు అందడంతో దీపక్‌ను పిలిచి విచారించాం. మహిళలపై భౌతిక దాడికి పాల్పడడంతో సంబంధిత సెక్షన్ల కింద దీపక్‌ను అరెస్టు చేశాం’’ అని డీఎస్పీ సందేశ్‌ తెలిపారు.