నగాల్‌ @ 95

లండన్‌: భారత టెన్నిస్‌ స్టార్‌ సుమిత్‌ నగాల్‌ తన కెరీర్‌లో అత్యుత్తమ ర్యాంకు సాధించాడు. సోమవారం ప్రకటించిన ఏటీపీ పురుషుల సింగిల్స్‌ ర్యాంకింగ్స్‌లో నగాల్‌ 95వ స్థానంలో నిలిచాడు. చెన్నై ఓపెన్‌, ఓ ఏటీపీ ఛాలెంజర్‌ టోర్నీ నెగ్గిన నగాల్‌.. ఫిబ్రవరిలో 97వ ర్యాంకు సాధించాడు. ఆ తర్వాత కూడా నిలకడగా రాణించడంతో ఇప్పుడు మరో రెండు స్థానాలు మెరుగయ్యాడు. చెన్నై ఓపెన్‌లో విజయం తర్వాత అతను మరో రెండు ఛాలెంజర్‌, ఓ ఏటీపీ 500, రెండు ఏటీపీ 1000 మాస్టర్స్‌ టోర్నీల్లో ఆడాడు. బెంగళూరు ఛాలెంజర్‌ టోర్నీలో సెమీస్‌ వరకూ వెళ్లాడు. ఈ ఏడాది ఆస్ట్రేలియన్‌ ఓపెన్‌ ప్రధాన డ్రాకు అర్హత సాధించిన నగాల్‌.. ఇందులో సీడెడ్‌ ఆటగాణ్ని (కజకిస్థాన్‌కు చెందిన బబ్లిక్‌) ఓడించిన తొలి భారత క్రీడాకారుడిగా నిలిచాడు. కానీ రెండో రౌండ్‌ దాటలేకపోయాడు. మొరాకోలో జరిగే ఏటీపీ 250 టోర్నీ కోసం నగాల్‌ సిద్ధమవుతున్నాడు.