అసిత విజృంభణ.. లంకకు ఆధిక్యం

ఛట్టోగ్రామ్‌: బంగ్లాదేశ్‌తో టెస్టు సిరీస్‌ను శ్రీలంక   క్లీన్‌స్వీప్‌ చేసే దిశగా దూసుకెళ్తోంది. పేసర్‌ అసిత ఫెర్నాండో (4/34) విజృంభించడంతో రెండో టెస్టులో శ్రీలంక భారీ ఆధిక్యం సంపాదించింది. ఓవర్‌నైట్‌ స్కోరు 55/1తో సోమవారం ఉదయం తొలి ఇన్నింగ్స్‌ కొనసాగించిన బంగ్లా.. 178 పరుగులకే కుప్పకూలింది. అసిత, విశ్వ ఫెర్నాండో (2/38), లహిరు కుమార (2/19), ప్రబాత్‌ జయసూర్య (2/65) సత్తాచాటి శ్రీలంకకు 353 పరుగుల తొలి ఇన్నింగ్స్‌ ఆధిక్యాన్ని అందించారు. బంగ్లా జట్టులో జాకిర్‌ హసన్‌ (54; 104 బంతుల్లో 8×4) ఒక్కడే చెప్పుకోదగ్గర స్కోరు సాధించాడు. మూడో రోజు ఆట ముగిసే సమయానికి శ్రీలంక రెండో ఇన్నింగ్స్‌లో 25 ఓవర్లలో 6 వికెట్లకు 102 పరుగులు రాబట్టింది. ప్రస్తుతం శ్రీలంక ఖాతాలో 455 పరుగులు ఉన్నాయి. ఏంజెలో మాథ్యూస్‌ (39 బ్యాటింగ్‌; 50 బంతుల్లో 3×4) క్రీజులో ఉన్నాడు.