లంక గెలుపు ఆలస్యం!

రెండో టెస్టులో లక్ష్యం 511.. బంగ్లా 268/7

ఛట్టోగ్రామ్‌: బంగ్లాదేశ్‌తో టెస్టు సిరీస్‌ను శ్రీలంక క్లీన్‌స్వీప్‌ చేయడం లాంఛనమే కావచ్చు. కానీ.. రెండో టెస్టులో ఆ జట్టు విజయం ఆలస్యమైంది. ప్రత్యర్థికి 511 పరుగుల భారీ లక్ష్యాన్ని నిర్దేశించి నాలుగో రోజే మ్యాచ్‌ను ముగించాలని చూసిన లంకకు నిరీక్షణ తప్పలేదు. రెండో ఇన్నింగ్స్‌లో పోరాడుతున్న బంగ్లా.. ఆట చివరికి 268/7తో నిలిచింది. 3 వికెట్లే చేతిలో ఉన్న బంగ్లా ఇంకా 243 పరుగులు చేయాలి. అద్భుతాలు జరిగితే తప్ప ఆ జట్టుకు ఓటమి తప్పకపోవచ్చు. తొలి ఇన్నింగ్స్‌లో 168 పరుగులకే కుప్పకూలిన బంగ్లా.. రెండో ఇన్నింగ్స్‌లో పోరాట పటిమ చూపింది. ఆ జట్టులో ప్రతి బ్యాటర్‌ రెండంకెల స్కోరు సాధించాడు. మొమినుల్‌ (50), షకిబ్‌ (38), లిటన్‌ దాస్‌ (38), మెహదీ మిరాజ్‌ (44 బ్యాటింగ్‌) పట్టుదల ప్రదర్శించారు. లంక బౌలర్లలో కుమార (2/41), కమిందు మెండిస్‌ (2/22), ప్రబాత్‌ (2/79) రాణించారు. మిరాజ్‌కు తోడుగా తైజుల్‌ (10 బ్యాటింగ్‌) క్రీజులో ఉన్నాడు. తొలి ఇన్నింగ్స్‌లో 531 పరుగుల భారీ స్కోరు చేసిన లంక.. రెండో ఇన్నింగ్స్‌ను 157/7 వద్ద డిక్లేర్‌ చేసింది.