గుకేశ్‌ ఓటమి.. ప్రజ్ఞానందకు డ్రా

టొరంటో: క్యాండిడేట్స్‌ చెస్‌ టోర్నీలో భారత గ్రాండ్‌మాస్టర్‌ గుకేశ్‌కు పరాజయం ఎదురైంది. శుక్రవారం జరిగిన ఏడో రౌండ్లో అలీ రెజా (2.5 పాయింట్లు- ఫ్రాన్స్‌) చేతిలో గుకేశ్‌ (4 పాయింట్లు) ఓటమి చవిచూశాడు. ఆరో రౌండ్లో గెలుపుతో సంయుక్తంగా అగ్రస్థానంలో నిలిచిన గుకేశ్‌.. తాజా పరాజయంతో వెనుకబడ్డాడు. హికరు నకముర (3.5- అమెరికా)తో డ్రా చేసుకున్న నెపోమ్నియాషి (4.5- రష్యా) అగ్రస్థానంలో కొనసాగుతున్నాడు. ఫాబియానో కరువానా (4- అమెరికా)తో భారత గ్రాండ్‌మాస్టర్‌ ప్రజ్ఞానంద (4), నజత్‌ అబసోవ్‌ (2- అజర్‌బైజాన్‌)తో విదిత్‌ గుజరాతీ (3.5) డ్రా చేసుకున్నారు. ఏడు రౌండ్ల అనంతరం గుకేశ్‌, ప్రజ్ఞానంద, కరువానా నాలుగేసి పాయింట్లతో ఉమ్మడిగా ద్వితీయ స్థానంలో ఉన్నారు. మహిళల విభాగంలో అనా ముజిచుక్‌ (2.5- ఉక్రెయిన్‌)తో కోనేరు హంపి (2.5) డ్రా చేసుకుంది. టింగ్‌జీ లీ (4- చైనా) చేతిలో వైశాలి (2.5) పరాజయం చవిచూసింది.