మరో సింధుని అవుతా

దిల్లీ: పి.వి.సింధునే తనకు స్ఫూర్తి అని ఆమెలాగే తానూ ఛాంపియన్‌ ప్లేయర్‌గా ఎదగాలని కోరుకుంటున్నానని యువ షట్లర్‌ తన్విశర్మ చెప్పింది. 15 ఏళ్ల తన్వి.. ఈ నెల చైనాలో జరిగే ఉబర్‌కప్‌లో పాల్గొనే భారత జట్టులో చోటు దక్కించుకున్న పిన్న వయస్కురాలు. ‘‘సింధు అక్కలాగే కావాలని ఉంది. ఆమే నా స్ఫూర్తి. సింధు ఆడిన అన్ని మ్యాచ్‌లు వదలకుండా చూస్తా. ఆమె దూకుడు ఎంతో ఇష్టం. ఆసియా జూనియర్‌ ఛాంపియన్‌షిప్‌లో పసిడి గెలవడం ఆత్మవిశ్వాసాన్ని ఎంతో పెంచింది’’ అని తన్వి తెలిపింది. ఆసియా టీమ్‌ ఛాంపియన్‌షిప్‌ బరిలో దిగకపోయినా.. సీనియర్ల ఆటను గమనించి ఎంతో నేర్చుకున్నానని  తన్వి చెప్పింది. పంజాబ్‌లోని హోషియార్‌పుర్‌కు చెందిన తన్వి పిన్న వయసులోనే  బ్యాడ్మింటన్‌లో అదరగొడుతోంది.