తిరుగులేని వెర్‌స్టాపెన్‌

షాంఘై: ఫార్ములావన్‌ స్టార్‌ రేసర్‌, డిఫెండింగ్‌ ఛాంపియన్‌ మ్యాక్స్‌ వెర్‌స్టాపెన్‌కు తిరుగులేదు. అద్భుత ప్రదర్శన కొనసాగుతున్న ఈ రెడ్‌బుల్‌ రేసర్‌ ఈ సీజన్‌లోనూ వరుస విజయాలు నమోదు చేస్తున్నాడు. ఆదివారం చైనీస్‌ గ్రాండ్‌ ప్రి రేసులో అతను విజేతగా నిలిచాడు. ఈ సీజన్‌లో జరిగిన అయిదు రేసుల్లో ఈ డచ్‌ రేసర్‌కు ఇది నాలుగో విజయం. గత 27 రేసుల్లో 23వది. 2019 తర్వాత తొలిసారి చైనాలో జరిగిన ఈ రేసులో వెర్‌స్టాపెన్‌ ఆధిపత్యం ప్రదర్శించాడు. గంటా 40 నిమిషాల 52.554 సెకన్లలో రేసును ముగించి అగ్రస్థానంలో నిలిచాడు. నోరిస్‌ (మెక్‌లారెన్‌), పెరెజ్‌ (రెడ్‌బుల్‌), లెక్లెర్క్‌ (ఫెరారీ), సెయింజ్‌ జూనియర్‌ (ఫెరారీ) వరుసగా ఆ తర్వాతి స్థానాలను సొంతం చేసుకున్నారు. దిగ్గజం హామిల్టన్‌ (మెర్సీడెజ్‌) 9వ స్థానంతో సంతృప్తి చెందాడు. చైనా రేసర్‌ జో గుయాన్య 14వ స్థానాన్ని దక్కించుకున్నాడు.