ఆసియా జూనియర్‌ అథ్లెటిక్స్‌కు ‘లక్ష్య’ హిమతేజ

దుబాయ్‌: ఈనాడు సీఎస్‌ఆర్‌ కార్యక్రమం ‘లక్ష్య’ క్రీడాకారుడు వల్లిపి హిమతేజ అంతర్జాతీయ వేదికపై సత్తాచాటేందుకు సిద్ధమయ్యాడు. బుధవారం ప్రారంభంకానున్న ఆసియా జూనియర్‌ (అండర్‌-20) అథ్లెటిక్స్‌ ఛాంపియన్‌షిప్‌లో తన అదృష్టం పరీక్షించుకోనున్నాడు. పురుషుల 4×400 మీటర్ల రిలేలో హిమతేజ బరిలో దిగుతున్నాడు. 4×100 మీ బృందంలో హిమతేజతో పాటు కార్తికేయన్‌ సౌందరరాజన్‌, మహేంద్ర, రోహన్‌ ఘోష్‌ కూడా ఉన్నారు. ఈ పోటీల్లో తెలుగు రాష్ట్రాల నుంచి దొండపాటి జయరాం (200 మీ, 4×400 మీ రిలే), దొడ్ల సాయి సంగీత (400 మీ, 4×400 మీ రిలే) పాల్గొంటున్నారు. ‘‘నిరుడు పురుషుల విభాగంలో 4×100 మీ రిలే జట్టు కాంస్యం, 4×400 మీ బృందం రజత పతకాలు సాధించాయి. ఈసారి రెండు విభాగాల్లో స్వర్ణాలు గెలిచే అవకాశాలు ఉన్నాయి’’ అని భారత జూనియర్‌ అథ్లెటిక్స్‌ చీఫ్‌ కోచ్‌ నాగపురి రమేశ్‌ తెలిపాడు.