శ్రీజ.. సింగిల్స్‌లోనూ

పారిస్‌ ఒలింపిక్స్‌ జట్టులో చోటు

దిల్లీ: తెలుగుతేజం ఆకుల శ్రీజ టీమ్‌ విభాగంతో పాటు సింగిల్స్‌లోనూ పారిస్‌ ఒలింపిక్స్‌ బరిలో నిలవనుంది. గురువారం భారత టేబుల్‌ టెన్నిస్‌ సమాఖ్య.. పారిస్‌ ఒలింపిక్స్‌లో పోటీపడే ఆరుగురు సభ్యుల జాబితాను ప్రకటించింది. వెటరన్‌ ఆటగాడు శరత్‌ కమల్‌, హర్మీత్‌ దేశాయ్‌, మానవ్‌ టక్కర్‌ పురుషుల బృందంలో ఎంపికవగా.. మనిక బత్రా, ఆకుల శ్రీజ, అర్చన కామత్‌లకు మహిళల జట్టులో చోటు లభించింది. ప్రపంచ టీటీ ర్యాంకింగ్స్‌ ఆధారంగా పురుషుల్లో శరత్‌ కమల్‌, హర్మీత్‌.. మహిళల్లో మనిక, శ్రీజ సింగిల్స్‌లోనూ అదృష్టం పరీక్షించుకోనున్నారు. 41 ఏళ్ల శరత్‌కమల్‌ ఒలింపిక్స్‌లో పోటీపడనుండటం ఇది అయిదోసారి. తొలిసారి అతడు 2004 ఏథెన్స్‌ ఒలింపిక్స్‌లో ఆడాడు. తెలుగమ్మాయి శ్రీజ తొలిసారి ఒలింపిక్స్‌లో పోటీపడనుంది.