నిఖత్‌ పసిడి పంచ్‌

మీనాక్షికి కూడా స్వర్ణం

అస్తానా (కజకిస్థాన్‌): ఎలోర్డా కప్‌ బాక్సింగ్‌ టోర్నమెంట్లో తెలంగాణా అమ్మాయి నిఖత్‌ జరీన్‌ సత్తా చాటింది. పారిస్‌ ఒలింపిక్స్‌ ముంగిట ఫామ్‌ను కొనసాగిస్తూ స్వర్ణం కైవసం చేసుకుంది. శనివారం 52 కేజీల తుదిపోరులో ఆమె 5-0తో ఉర్క్‌బయెవా (కజకిస్థాన్‌)ను చిత్తు చేసింది. ఈ టోర్నీలో దూకుడుగా ఆడి ఫైనల్‌కు వచ్చిన నిఖత్‌.. పసిడి పోరులోనూ అదరగొట్టింది. ప్రత్యర్థికి ఎక్కడా అవకాశం ఇవ్వకుండా విజయాన్ని అందుకుంది. మరో భారత బాక్సర్‌ మీనాక్షి కూడా స్వర్ణాన్ని సొంతం చేసుకుంది. 48 కేజీల విభాగం ఫైనల్లో ఆమె 4-1తో రహ్‌మనోవా (ఉజ్బెకిస్థాన్‌)ను ఓడించింది. ప్రత్యర్థి నుంచి పోటీ ఎదురైనా నిలిచిన మీనాక్షి విజయాన్ని చేజిక్కించుకుంది. అనామిక (50 కేజీ), మనీషా (60 కేజీ)లకు నిరాశ ఎదురైంది. ఈ భారత అమ్మాయిలు ఫైనల్లో ఓడి రజతాలతో సరిపెట్టుకున్నారు. అనామిక 1-4తో వుయూ (చైనా) చేతితో ఓడగా.. మనీషా 5-0తో గ్రాఫీవా (కజకిస్థాన్‌) చేతిలో చిత్తయింది.