నా బ్యాటింగ్‌ అంత గొప్పగా లేదు: రోహిత్‌

ముంబయి: ప్రస్తుత ఐపీఎల్‌లో తన బ్యాటింగ్‌ ఆశించిన ప్రమాణాల మేర లేదని టీమ్‌ఇండియా కెప్టెన్‌ రోహిత్‌ శర్మ అన్నాడు. కానీ దాని గురించి అతిగా ఆలోచించాల్సిన అవసరం లేదని అభిప్రాయపడ్డాడు. ‘‘బ్యాటర్‌గా నేను ఆశించిన ప్రమాణాల మేర ఆడలేదని నాకు తెలుసు. కానీ ఇన్నేళ్లు ఆడిన అనుభవంతో నాకో విషయం మాత్రం తెలుసు. అతిగా ఆలోచిస్తే నేను బాగా ఆడలేను’’ అని రోహిత్‌ అన్నాడు. ‘‘సానుకూల దృక్పథంతో ఉండడానికి ప్రయత్నిస్తా. సాధన చేస్తూ నా ఆటలోని లోపాలను సవరించుకుంటా. నేను ఎప్పుడూ చేసేది అదే. ముంబయికి ఈ సీజన్‌ ప్రణాళిక ప్రకారం సాగలేదు. అందుకు మమ్మల్ని మేమే నిందించుకోవాలి. చాలా తప్పులు చేశాం. గెలవాల్సిన చాలా మ్యాచ్‌ల్లో ఓడిపోయాం. కానీ ఐపీఎల్‌లో ఇలా జరగడం మామూలే. కొన్ని అవకాశాలే లభిస్తాయి. వాటిని సద్వినియోగం చేసుకోవాలి’’ అని చెప్పాడు.