అర్జున్‌ గేమ్‌ డ్రా

షార్జా: షార్జా మాస్టర్స్‌ చెస్‌ టోర్నమెంట్లో తెలంగాణ ఆటగాడు అర్జున్‌ ఇరిగేశి మూడో స్థానంలో కొనసాగుతున్నాడు. ఆదివారం అయిదో రౌండ్లో వాల్డర్‌ మర్జిన్‌ (రష్యా)తో అర్జున్‌ డ్రాకు అంగీకరించాడు. దీంతో 3.5 పాయింట్లతో అర్జున్‌.. సంకల్ప్‌ గుప్తా, సలెమ్‌ (యూఏఈ) తదితరులతో కలిసి ఉమ్మడిగా మూడో స్థానంలో కొనసాగుతున్నాడు. మరోవైపు ఇమెర్‌ కాన్‌ (టర్కీ) చేతిలో ద్రోణవల్లి హారిక ఓడిపోగా.. టర్కీ ఆటగాడు ముస్తాఫాతో రాజా రిత్విక్‌ డ్రా చేసుకున్నాడు. ఈ టోర్నీలో భారత గ్రాండ్‌మాస్టర్‌ అరవింద్‌ చిదంబరం (4.5) అగ్రస్థానంలో కొనసాగుతున్నాడు. అయిదో రౌండ్లో అతడు స్థానిక ఆటగాడు సలెమ్‌పై విజయం సాధించాడు.