ధోని ఆఖరి మ్యాచ్‌ ఆడాడని అనుకోవట్లేదు

దిల్లీ: దిగ్గజ ఆటగాడు మహేంద్రసింగ్‌ ధోని తన కెరీర్‌లో చివరి ఐపీఎల్‌ మ్యాచ్‌ ఆడినట్లు తాను భావించట్లేదని భారత మాజీ ఆటగాడు అంబటి రాయుడు అన్నాడు. ధోని మరింత కాలం కొనసాగేందుకు ఇంపాక్ట్‌ ప్లేయర్‌ నిబంధనను బీసీసీఐ కొనసాగించాలని రాయుడు కోరాడు. ‘‘బెంగళూరుతో మ్యాచ్‌ ధోనీకి ఐపీఎల్‌లో చివరిదని అనుకోవట్లేదు. ఇలా కెరీర్‌ను ముగించాలని అతను భావించడు. ధోని ఔటైనప్పుడు కొంచెం నిరుత్సాహంగా కనిపించాడు. అతనెప్పుడూ అలా ఉండడు. ప్లేఆఫ్స్‌కు అర్హత సాధించి గొప్పగా ముగించాలని అనుకుని ఉంటాడు. అయితే ధోని గురించి ఏమీ చెప్పలేం. వచ్చే ఏడాది అతను మళ్లీ రావొచ్చు. చివరి కొన్ని ఓవర్లలో వచ్చి ప్రభావం చూపే అవకాశాన్ని ధోనీకి ఇంపాక్ట్‌ ప్లేయర్‌ నిబంధన ఇస్తుంది. ధోని ఆటను ఇంకా చూడాలనుకుంటున్నాం కాబట్టి ఇంపాక్ట్‌ ప్లేయర్‌ నిబంధనను బీసీసీఐ తొలగించకపోవడమే మంచిది. కాబట్టి ధోని ఆటను చూడాలా? వద్దా? అన్నది బీసీసీఐ చేతుల్లో ఉంది’’ అని రాయుడు అన్నాడు.