ప్రసారదారుపై మండిపడ్డ రోహిత్‌

దిల్లీ: క్రికెటర్ల వ్యక్తిగత గోప్యతకు భంగం కలిగిస్తోందటూ ఐపీఎల్‌ ప్రసారదారుపై భారత కెప్టెన్‌ రోహిత్‌ శర్మ మండిపడ్డాడు. ప్రాక్టీసులో స్నేహితులు, సహచరులతో సంభాషణల్ని రికార్డు చేసి, ప్రసారం చేయడంపై రోహిత్‌ అసహనం వ్యక్తం చేశాడు. ముంబయి ఇండియన్స్‌లో తన భవిష్యత్తు గురించి ఆలోచిస్తున్నట్లు కోల్‌కతా నైట్‌రైడర్స్‌ సహాయ కోచ్‌ అభిషేక్‌ నాయర్‌తో రోహిత్‌ అన్నట్లుగా వెలుగులోకి వచ్చిన వీడియో వైరల్‌ అయింది. ‘‘క్రికెటర్ల జీవితాల్లోకి సులువుగా చొరబాట్లు జరుగుతున్నాయి. ప్రాక్టీసు లేదా మ్యాచ్‌ రోజుల్లో స్నేహితులు, సహచరులతో ఏకాంతంలో జరిపే ప్రతి సంభాషణను కెమెరాలు రికార్డు చేస్తున్నాయి. నా సంభాషణను రికార్డు చేయొద్దంటూ ప్రసారదారును కోరినా నా గోప్యతకు భంగం కలిగిస్తూనే ఉంది. వీక్షణను పెంచుకోవడం కోసం ప్రత్యేక కథనాలపై దృష్టిసారించడం వల్ల క్రికెటర్లు, అభిమానులు, క్రికెట్‌ మధ్య విశ్వాసం దెబ్బతింటోంది’’ అని ఎక్స్‌’ వేదికగా రోహిత్‌ పేర్కొన్నాడు.