వయసుకు మినహాయింపు ఉండదు

దిల్లీ: క్రికెటర్‌గా కొనసాగాలంటే కఠోర సాధన చేయడం.. వీలైనంతగా ఫిట్‌గా ఉండడమే కీలకమని వయసుకు ఎవరూ మినహాయింపు ఇవ్వరని మహేంద్రసింగ్‌ ధోని అన్నాడు. 43 ఏళ్లకు చేరువైన ధోనికి ఇదే చివరి ఐపీఎల్‌ అనే ఊహాగానాలు రేగుతున్న నేపథ్యంలో అతడిలా స్పందించాడు. ‘‘ఏడాది మొత్తం క్రికెట్‌ ఆడట్లేదు. అందుకే ఐపీఎల్‌ వచ్చేసరికి ఫిట్‌గా ఉండాలి. ఈ లీగ్‌లో అంతర్జాతీయ క్రికెట్‌ ఆడుతున్న యువ ఆటగాళ్లతో తలపడాల్సి ఉంటుంది. అందుకే ప్రొఫెషనల్‌ ఆట అంత తేలికేం కాదు. ఇందులో వయసుకు ఎవరూ మినహాయింపు ఇవ్వరు. ఆడాలని అనుకుంటే ఫిట్‌గా ఉండక తప్పదు. ఆహార అలవాట్లను మార్చుకోవడంతో పాటు కఠోర సాధన చేయాలి. మానసికంగా ప్రభావం చూపించే సామాజిక మాధ్యమాలకు దూరంగా ఉండాలి’’ అని ధోని పేర్కొన్నాడు. అంతర్జాతీయ క్రికెట్‌కు వీడ్కోలు చెప్పిన తర్వాత కుటుంబానికే ఎక్కువ సమయం కేటాయిస్తున్నట్లు తెలిపాడు. ‘‘అంతర్జాతీయ క్రికెట్‌ నుంచి రిటైర్‌ అయ్యాక కుటుంబంతో ఎక్కువ సమయం గడుపుతున్నా. నాకెంతో  ఇష్టమైన వ్యవసాయంపై దృష్టి పెట్టా. మోటార్‌బైకులు, వింటేజ్‌ కార్లలో తిరుగుతున్నా. కుక్కలను పెంచడం అంటే కూడా ఎంతో ఇష్టం’’ అని మహి పేర్కొన్నాడు.