సాత్విక్‌ జోడీకి షాక్‌

తొలి రౌండ్లోనే ఇంటిముఖం 
సింగపూర్‌ ఓపెన్‌ 

సింగపూర్‌: భారత డబుల్స్‌ స్టార్లు సాత్విక్‌ సాయిరాజ్‌-చిరాగ్‌శెట్టిలకు షాక్‌! సింగపూర్‌ ఓపెన్‌ బ్యాడ్మింటన్‌ టోర్నీలో ఈ నంబర్‌వన్‌ జంట తొలి రౌండ్లోనే ఇంటిముఖం పట్టింది. పారిస్‌ ఒలింపిక్స్‌ ముంగిట ఫామ్‌ చాటుకునే ఉద్దేశంతో బరిలో దిగిన సాత్విక్‌ ద్వయం తొలి రౌండ్లో 20-22, 18-21తో డానియల్‌ లాండ్‌గార్డ్‌-మాడ్స్‌ వెస్టర్‌గార్డ్‌ (డెన్మార్క్‌) జంట చేతిలో కంగుతింది. 47 నిమిషాల్లో ముగిసిన ఈ పోరులో స్వాతిక్‌ జంట పోరాడినా.. ఫినిషింగ్‌ చేయలేకపోయింది. తొలి గేమ్‌లో విరామ సమయానికి 6-11తో వెనుకబడిన భారత జోడీ.. తర్వాత పుంజుకుంది. 17-17తో స్కోరు సమం చేసింది. ఒక దశలో 20-18తో గేమ్‌ గెలిచేందుకు సిద్ధమైంది. ఈ స్థితిలో తడబడిన సాత్విక్‌ జంట.. ప్రత్యర్థికి పుంజుకునే అవకాశం ఇచ్చింది. దీంతో ఈ గేమ్‌ను డెన్మార్క్‌ జోడీ గెలుచుకుంది. రెండో గేమ్‌లోనూ సాత్విక్‌-చిరాగ్‌ సహజసిద్ధంగా  ఆడలేకపోయారు. అనవసర తప్పిదాలతో 3-6తో వెనుకబడిన భారత ద్వయం.. ఆ తర్వాత గాడిలో పడింది. 17-16తో ఒక దశలో ఆధిక్యంలోకి కూడా వెళ్లింది. కానీ ఈ స్థితిలో మళ్లీ తడబడి గేమ్‌తో పాటు మ్యాచ్‌ కోల్పోయింది. పురుషుల సింగిల్స్‌ తొలి రౌండ్లో ప్రియాన్షు రజావత్‌ 21-23, 19-21తో లీ చెక్‌ (అమెరికా) చేతిలో ఓడగా.. మహిళల సింగిల్స్‌లో ఆకర్షి కశ్యప్‌ 19-21, 20-22తో చోయిక్‌వాంగ్‌ (థాయ్‌లాండ్‌)కు తలొంచింది. మహిళల డబుల్స్‌ తొలి రౌండ్లో రుతుపర్ణా-శ్వేతపర్ణా 12-21, 21-12, 13-21తో చాంగ్‌చింగ్‌-యెం్ చింగ్‌ (చైనీస్‌ తైపీ) చేతిలో.. మిక్స్‌డ్‌ డబుల్స్‌ తొలి రౌండ్లో సూర్య-అమృత 8-21, 17-21తో లీచున్‌-జుయూ (కొరియా) చేతిలో ఓడారు.