పార్కులో ప్రాక్టీసా?

న్యూయార్క్‌: టీ20 ప్రపంచకప్‌లో సౌకర్యాలపై భారత జట్టు చీఫ్‌ కోచ్‌ రాహుల్‌ ద్రవిడ్‌ అసంతృప్తి వ్యక్తంజేశాడు. పార్కులో ప్రాక్టీసు చేయడం వింతగా ఉందని పేర్కొన్నాడు. న్యూయార్క్‌లో మ్యాచ్‌లు ఆడనున్న జట్లకు ప్రధాన స్టేడియానికి అయిదు మైళ్ల దూరంలో ఉన్న కాంటియాగ్‌ పార్కులో సాధనకు ఏర్పాట్లు చేశారు. ‘‘పార్కులో ప్రాక్టీసు చేయడం వింతగా ఉంది. ప్రపంచకప్‌లో పెద్ద స్టేడియాల్లో సాధన ఉంటుంది. సంప్రదాయ క్రికెట్‌ స్టేడియాలు అందుబాటులో ఉంటాయి. కాని మేం ప్రజలు ఉపయోగించుకునే పార్కులో ప్రాక్టీసు చేస్తున్నాం’’ అని ద్రవిడ్‌ పేర్కొన్నాడు.