మోకాలి శస్త్రచికిత్స విజయవంతం

పారిస్‌: తన కుడి మోకాలికి నిర్వహించిన శస్త్రచికిత్స విజయవంతమైనట్లు టెన్నిస్‌ స్టార్‌ నొవాక్‌ జకోవిచ్‌ తెలిపాడు. వీలైనంత త్వరగా మళ్లీ బరిలో దిగాలని భావిస్తున్నట్లు చెప్పాడు. ఫ్రెంచ్‌ ఓపెన్‌లో ఫ్రాన్సిస్కో సెరుండోలోతో నాలుగో రౌండ్‌ మ్యాచ్‌లో జకోవిచ్‌ గాయపడ్డాడు. బుధవారం అతని మోకాలికి శస్త్రచికిత్స నిర్వహించారు. ‘‘గత మ్యాచ్‌లో గాయపడ్డాక కొన్ని కఠిన నిర్ణయాలు తీసుకోవాల్సి వచ్చింది. శస్త్రచికిత్స బాగా జరిగినందుకు ఆనందంగా ఉంది. నా పక్కనున్న వైద్య బృందానికి అభినందనలు. వీలైనంత త్వరగా ఫిట్‌నెస్‌ సాధించి కోర్టులో అడుగుపెట్టేందుకు ప్రయత్నిస్తా’’ అని జకోవిచ్‌ పేర్కొన్నాడు.