అమెరికాకు ఆశలు..

డల్లాస్‌: భారత్, పాకిస్థాన్, అమెరికా, కెనడా, ఐర్లాండ్‌.. ఇవీ టీ20 ప్రపంచకప్‌లో గ్రూప్‌- ఎ జట్లు. ప్రతి గ్రూప్‌లోనూ ఒక్కో జట్టు.. మిగతా నాలుగు జట్లతో ఒక్కో మ్యాచ్‌ ఆడుతోంది. గ్రూప్‌లో తొలి రెండు స్థానాల్లో నిలిచిన జట్లు సూపర్‌-8కు అర్హత సాధిస్తాయి. ఈ నేపథ్యంలో గ్రూప్‌- ఎ నుంచి భారత్, పాకిస్థాన్‌ కచ్చితంగా ముందంజ వేస్తాయనే అంచనాలు నెలకొన్నాయి. కానీ పాక్‌పై సంచలన విజయంతో సమీకరణాలను అమెరికా మార్చేసింది. గురువారం అర్ధరాత్రి దాటిన తర్వాత ముగిసిన ఈ మ్యాచ్‌లో.. సూపర్‌ ఓవర్లో యుఎస్‌ అద్భుత విజయాన్ని అందుకుంది. మొదట పాక్‌ 20 ఓవర్లలో 7 వికెట్లకు 159 పరుగులు చేసింది. ఛేదనలో యుఎస్‌ కూడా 20 ఓవర్లలో 3 వికెట్లకు 159 పరుగులే చేసింది. ‘మ్యాన్‌ ఆఫ్‌ ద మ్యాచ్‌’ కెప్టెన్‌ మోనాంక్‌ పటేల్‌ (50) విలువైన ఇన్నింగ్స్‌ ఆడాడు. ఆండ్రీస్‌ గౌస్‌ (35), ఆరోన్‌ జోన్స్‌ (36 నాటౌట్‌) కీలక పరుగులు చేశారు. అనంతరం సూపర్‌ ఓవర్లో మొదట అమెరికా 18 పరుగులు చేసింది. అమీర్‌ వేసిన ఈ ఓవర్లో వైడ్ల రూపంలోనే 7 పరుగులు రావడం గమనార్హం. ఆ తర్వాత సౌరభ్‌ గొప్పగా బౌలింగ్‌ చేయడంతో పాక్‌ 13 పరుగులకే పరిమితమైంది. అమెరికా ఇప్పటికే కెనడాపై గెలిచింది. రెండు విజయాలతో గ్రూప్‌లో అగ్రస్థానంలో ఉంది. ఇంకా భారత్, ఐర్లాండ్‌తో ఆడాల్సి ఉంది. ఒకవేళ భారత్‌తో ఓడిపోయినా.. ఐర్లాండ్‌పై గెలిస్తే అమెరికా సూపర్‌-8కు అర్హత సాధించడం తేలికే. మిగతా రెండు మ్యాచ్‌ల్లో ఓడినా ఆ జట్టు అవకాశాలను కొట్టిపారేయలేం. పాక్‌ ఇంకా భారత్, కెనడా, ఐర్లాండ్‌తో ఆడాల్సి ఉంది. టీమ్‌ఇండియా చేతిలో ఓడి, మిగతా మ్యాచ్‌ల్లో గెలిచినా పాక్‌ ముందంజ వేయడం కష్టమే.