Harmanpreet: హర్మన్‌ప్రీత్‌ హ్యాట్రిక్‌.. భారత్‌ విజయం

ఆంట్వెర్ప్‌ (బెల్జియం): కెప్టెన్‌ హర్మన్‌ప్రీత్‌ సింగ్‌ హ్యాట్రిక్‌ గోల్స్‌ నమోదు చేయడంతో ఎఫ్‌ఐహెచ్‌ ప్రొ లీగ్‌ హాకీలో భారత్‌ 5-4తో అర్జెంటీనాను ఓడించింది. ఆరంభంలో రెండు జట్లు నువ్వానేనా అన్నట్టుగా పోరాడాయి. ఫెడెరికో మోంజా (3వ నిమిషం) మూడో నిమిషంలోనే గోల్‌ కొట్టడంతో అర్జెంటీనా 1-0 ఆధిక్యంలోకి వెళ్లింది. అరైజీత్‌ సింగ్‌ హుండాల్‌ (7వ నిమిషం) గోల్‌తో భారత్‌ నాలుగు నిమిషాల్లోనే స్కోరు సమం చేసింది. ఆ తర్వాత గుర్జాంత్‌ సింగ్‌ (18వ), హర్మన్‌ప్రీత్‌ (29వ, 50వ, 52వ నిమిషం) జట్టును విజయపథంలో నడిపారు. అర్జెంటీనా మరో రెండు గోల్స్‌ చేసినా.. భారత్‌ ఆఖరి వరకు ఆధిక్యాన్ని కొనసాగించింది.