Virat Kohli: మా భాగస్వామ్య రహస్యం టాటూలే.. : విరాట్‌ కోహ్లీ

ఇంటర్నెట్‌ డెస్క్‌ : ఈ సీజన్‌(IPL 2023)లో ఆర్సీబీ తరఫున విరాట్‌ కోహ్లీ-ఫాఫ్‌ డుప్లెసిస్‌(Virat Kohli-Faf du Plessis) ఓపెనింగ్‌ జంట అదరగొడుతోంది. సన్‌రైజర్స్‌(sunrisers hyderabad)తో గురువారం జరిగిన మ్యాచ్‌లోనూ ఈ జంట అద్భుతంగా ఆడింది. తొలి వికెట్‌కు వీరు 172 పరుగుల భాగస్వామ్యాన్ని నమోదు చేసి జట్టును విజయతీరాలకు చేర్చారు.

ఇక కోహ్లీ-డుప్లెసిస్‌ జంట విజయవంతమవడం వెనుక ఉన్న రహస్యం ఏంటని ప్రశ్నించగా.. ‘ మా ఇద్దరికి టాటూలు ఒకే విధంగా ఉన్నాయి. అందుకే అయి ఉంటుంది’ అని కోహ్లీ మ్యాచ్‌ అనంతరం సరదా సమాధానం చెప్పాడు. ‘కీలకమైన మ్యాచ్‌లో నేను ఇంపాక్ట్‌ చూపించినప్పుడు.. అది నాకు ఎంతో ఆత్మవిశ్వాసాన్ని ఇస్తుంది. అలాగే జట్టుకు కూడా. ఇక మా ఇద్దరి భాగస్వామ్య రహస్యం టాటూలు అయి ఉంటాయి. ఈ సీజన్‌లో మేమిద్దరం(Virat Kohli-Faf du Plessis) కలిసి దాదాపు 900 పరుగులు చేశాం. గతంలో ఏబీడీ(AB de Villiers)తో ఎలా అయితే ఆడానో.. ఇప్పుడు డుప్లెసిస్‌తో కలిసి అలాగే మ్యాచ్‌లను ముందుకు తీసుకెళ్తున్నాను. ఆట ఎటు వెళ్తుంది.. తర్వాత ఏం చేయాలనేదానిపై ఇద్దరి మధ్య అవగాహన ఉండాలంతే. అంతర్జాతీయ స్థాయి అనుభవమున్న కెప్టెన్‌ను కలిగి ఉండటం మా జట్టుకు కలిసివస్తోంది’ అని కోహ్లీ వివరించాడు.

ఇక హైదరాబాద్‌ స్టేడియంలో అభిమానుల నుంచి వచ్చిన స్పందనపై మాట్లాడుతూ..‘ఇది మా సొంతమైదానం వలే అనిపించింది. ఇక్కడి అభిమానులు మాకెంతో మద్దతు ప్రకటించారు. వారు నా పేరును పదే పదే ఉచ్ఛరిస్తూ.. మమ్మల్ని ఉత్సాహపరిచారు. దీన్ని మనం సృష్టించలేం. ఇలా చేయాలని మనం ఎవర్నీ బలవంత పెట్టలేం. నేను మైదానంలో ప్రతిదీ నిజాయతీతో చేస్తాను. అందుకే ఇంత గొప్ప అభిమానం నాకు దక్కిందని అనుకుంటున్నాను’ అని కోహ్లీ సంతోషం వ్యక్తం చేశాడు.