కోహ్లీకి కలిసొచ్చే ‘నంబర్‌ 18’.. ఆర్సీబీని ప్లేఆఫ్స్‌కు చేరుస్తుందా?

ఇంటర్నెట్‌ డెస్క్‌: పరుగుల వీరుడు విరాట్‌ కోహ్లీకి.. నంబర్‌ ‘18’కు ప్రత్యేక అనుబంధం ఉంది. అతడి జెర్సీ నంబర్‌ ఇదే. ఇప్పటికే ఈ నంబర్‌తో ఉన్న అనుబంధాన్ని ఎన్నోసార్లు విరాట్‌ పంచుకోగా.. ఈ ఐపీఎల్‌ ప్లేఆఫ్స్‌ సందర్భంగా మరోసారి ఈ నంబరు తెరపైకి వస్తోంది. దాని వెనకున్న ఆసక్తికర విషయాలేంటో తెలుసుకుందాం..

• ఐపీఎల్‌ ప్లేఆఫ్స్‌నకు ఇప్పటికే మూడు జట్లు (కోల్‌కతా, రాజస్థాన్‌, హైదరాబాద్‌) చేరాయి. టాప్‌ 4లో నిలిచే నాలుగో జట్టుపైనే అందరి దృష్టి. అయితే.. ఆ అవకాశం రెండు జట్లకు మాత్రమే ఉంది. చెన్నై, బెంగళూరు మధ్య జరిగే చివరి లీగ్‌ మ్యాచ్‌ ఆ నాలుగో జట్టును తేల్చనుంది. ఈ మ్యాచ్‌ జరిగేది మే ‘18’న కావడం విశేషం.
• ఈ మ్యాచ్‌లో ఆర్సీబీ గెలిచినా.. ఫ్లేఆఫ్స్‌ చేరడానికి చాలా సమీకరణాలు ఉన్నాయి. ఆర్సీబీ మొదట బ్యాటింగ్‌ చేస్తే ‘18’ పరుగుల తేడాతో, రెండోసారి ఆడితే ‘18’.1 ఓవర్లలో లక్ష్యాన్ని ఛేదించాలి. అప్పుడే కోహ్లీ జట్టు టాప్‌ 4లోకి చేరుతుంది.
• 2013 నుంచి ఐపీఎల్‌లో బెంగళూరు మే ‘18’ నాడు ఆడిన వాటిల్లో ఇప్పటివరకూ ఒక్క మ్యాచ్‌ కూడా ఓడలేదు. 
• ఇక మే 18నే విరాట్‌ అద్భుత బ్యాటింగ్‌ ప్రదర్శన చేశాడు. ఈ తేదీనే రెండు శతకాలు, ఒక అర్ద శతకం బాదాడు.
• మే 18న ఆర్సీబీ నాలుగు మ్యాచ్‌లు ఆడగా.. అందులో రెండుసార్లు చెన్నైతో తలపడింది. ఈ రెండింటిలోనూ బెంగళూరే విజయం సాధించింది. ఈ రెండు మ్యాచ్‌ల్లోనూ కోహ్లీ రాణించడం విశేషం.
• మరోసారి మే 18నే తాజా మ్యాచ్‌ జరుగుతుండటం.. ఈ తేదీ ఆర్సీబీకి, కోహ్లీకి కలిసి వస్తుండటంతో.. ఈసారి తన ఆధిపత్యాన్ని కొనసాగిస్తుందో.. లేదో చూడాలి.