Lucknow vs Punjab: ధావన్‌ పోరాటం వృథా.. బోణీ కొట్టిన లఖ్‌నవూ

లఖ్‌నవూ: ఐపీఎల్‌ - 2024 సీజన్‌లో లఖ్‌నవూ బోణీ కొట్టింది. పంజాబ్‌తో జరిగిన మ్యాచ్‌లో 21 పరుగుల తేడాతో విజయం సాధించింది. టాస్‌ నెగ్గి తొలుత బ్యాటింగ్‌ చేసిన లఖ్‌నవూ 8 వికెట్ల నష్టానికి 199 పరుగులు చేసింది. ఈ భారీ లక్ష్యఛేదనలో పంజాబ్‌కు శుభారంభమే దక్కినా చివర్లో దూకుడుగా ఆడలేక ఓటమిపాలైంది. నిర్ణీత 20 ఓవర్లలో 5 వికెట్ల నష్టానికి 178 పరుగులు చేసింది. శిఖర్ ధావన్‌ (70; 50 బంతుల్లో 7 ఫోర్లు, 3 సిక్స్‌లు) పోరాటం వృథా అయింది. జానీ బెయిర్‌స్టో (42; 29 బంతుల్లో 3 ఫోర్లు, 3 సిక్స్‌లు) దూకుడుగా ఆడాడు. మిగతా బ్యాటర్ల నుంచి సరైన సహకారం అందలేదు. ప్రభ్‌సిమ్రన్‌ సింగ్ (19; 7 బంతుల్లో) ధాటిగా ఆడినా ఎక్కువసేపు క్రీజులో నిలవలేదు. జితేశ్‌ శర్మ (6), సామ్ కరన్ (0) తీవ్రంగా నిరాశపర్చారు. లివింగ్‌స్టోన్‌ (28*; 17 బంతుల్లో 2 ఫోర్లు, 2 సిక్స్‌లు) మరింత దూకుడుగా ఆడితే మ్యాచ్‌ ఫలితం మరోలా ఉండేది. లఖ్‌నవూ బౌలర్లలో అరంగేట్ర ఆటగాడు మయాంక్‌ యాదవ్‌ (3/27) అదరగొట్టాడు. మోసిన్ ఖాన్ రెండు వికెట్లు పడగొట్టాడు.

లఖ్‌నవూ బ్యాటర్లలో క్వింటన్ డికాక్‌ (54; 38 బంతుల్లో 5 ఫోర్లు, 2 సిక్స్‌లు) అర్ధ శతకం బాదాడు. కెప్టెన్ నికోలస్ పూరన్ (42; 21 బంతుల్లో 3 ఫోర్లు, 3 సిక్స్‌లు) క్రీజులో ఉన్నంతసేపు దూకుడుగా ఆడాడు. చివర్లో కృనాల్ పాండ్య (43*; 22 బంతుల్లో 4 ఫోర్లు, 2 సిక్స్‌లు) మెరుపులు మెరిపించడంతో లఖ్‌నవూ భారీ స్కోరు సాధించింది. స్టాయినిస్ (19), కేఎల్ రాహుల్ (15) పరుగులు చేశారు. పంజాబ్‌ బౌలర్లలో సామ్‌ కరన్ 3, అర్ష్‌దీప్‌ సింగ్ 2, కగిసో రబాడ, రాహుల్ చాహర్ ఒక్కో వికెట్ తీశారు.