Rajasthan Vs Bengaluru: బట్లర్‌ శతకం.. రాజస్థాన్‌ నాలుగో విజయం

జైపుర్‌: ఐపీఎల్‌ 17లో రాజస్థాన్‌ జైత్రయాత్ర కొనసాగుతోంది. బెంగళూరుతో జరిగిన మ్యాచ్‌లో సంజూ సేన 6 వికెట్ల తేడాతో గెలుపొందింది. రాజస్థాన్‌కిది వరుసగా నాలుగో విజయం. ఈ సీజన్‌లో  బెంగళూరుకు ఇది నాలుగో ఓటమి. తొలుత బ్యాటింగ్ చేసిన బెంగళూరు 3 వికెట్ల నష్టానికి 183 పరుగులు చేసింది. విరాట్ కోహ్లీ (113*; 72 బంతుల్లో 12 ఫోర్లు, 4 సిక్స్‌లు) శతకం బాదాడు. 184 పరుగుల లక్ష్యాన్ని రాజస్థాన్‌ నాలుగు వికెట్లు కోల్పోయి మరో ఐదు బంతులు మిగిలుండగానే ఛేదించింది. ఓపెనర్‌ యశస్వి జైస్వాల్ (0) విఫలమైనా.. మరో ఓపెనర్‌ జోస్ బట్లర్ (100*; 58 బంతుల్లో 9 ఫోర్లు, 4 సిక్స్‌లు) చివరి దాకా క్రీజులో ఉండి సిక్సర్‌ బాది సెంచరీ పూర్తిచేసుకోవడంతోపాటు మ్యాచ్‌ను ముగించాడు.

వన్‌డౌన్ బ్యాటర్ సంజు శాంసన్‌ (69; 42 బంతుల్లో 8 ఫోర్లు, 2 సిక్స్‌లు) అర్ధ శతకంతో మెరిశాడు. బెంగళూరు బౌలర్లలో రీస్ టాప్లీ 2, యశ్‌ దయాల్, సిరాజ్‌ ఒక్కో వికెట్ పడగొట్టారు. బెంగళూరు బ్యాటర్లలో కోహ్లీతోపాటు డుప్లెసిస్‌ (44; 33 బంతుల్లో 2 ఫోర్లు, 2 సిక్స్‌లు) రాణించాడు. కోహ్లీ, డుప్లెసిస్‌ ద్వయం తొలి వికెట్‌కు 125 పరుగుల భాగస్వామ్యాన్ని నెలకొల్పింది. గ్లెన్ మ్యాక్స్‌వెల్ (1), సౌరభ్‌ చౌహన్‌ (9) సింగిల్ డిజిట్‌ స్కోరుకే పరిమితమయ్యారు. రాజస్థాన్‌ బౌలర్లలో యుజ్వేంద్ర చాహల్ 2, నంద్రి బర్గర్ ఒక వికెట్ పడగొట్టారు. 

మ్యాచ్‌ విశేషాలు

• బట్లర్‌కిది వందో ఐపీఎల్ మ్యాచ్‌. అతడు తన వందో మ్యాచ్‌లో 100 సాధించడం విశేషం. 

• ఐపీఎల్‌లో విరాట్ కోహ్లీకిది ఎనిమిదో సెంచరీ. ఈ శతకంతో ఐపీఎల్‌లో 7500 కంటే ఎక్కువ పరుగులు చేసిన తొలి ఆటగాడిగా రికార్డు సృష్టించాడు. ప్రస్తుతం కోహ్లీ 7579 పరుగులతో ఉన్నాడు.
• ఈ మ్యాచ్‌తో ఐపీఎల్ 17లో శతకం కరువు తీరిపోయింది. ఏకంగా ఇద్దరు (కోహ్లీ, బట్లర్) శతకాలు సాధించారు.