Ravindra jadeja: సీఎస్‌కేకు మద్దతు ఇవ్వండి.. గుజరాత్‌ అభిమానులకు జడేజా విజ్ఞప్తి

ఇంటర్నెట్ డెస్క్‌: టీమ్‌ఇండియా స్టార్‌ ఆల్‌రౌండర్ రవీంద్ర జడేజా ఐపీఎల్‌ (IPL 2023) 16వ సీజన్‌ టోర్నీకి సిద్ధమైపోయాడు. ఇప్పటికే జట్టు సభ్యులతో ప్రాక్టీస్‌ చేసిన జడ్డూ (Ravindra Jadeja) తాజాగా అహ్మదాబాద్‌ వేదికగా గుజరాత్‌ టైటాన్స్‌తో జరిగే మ్యాచ్‌పైనా ప్రత్యేకంగా మాట్లాడాడు. దీనికి సంబంధించిన వీడియోను చెన్నైసూపర్ కింగ్స్‌ ఫ్రాంచైజీ యూట్యూబ్‌లో విడుదల చేసింది. తమ జట్టుకు మద్దతు ఇవ్వాలని గుజరాత్‌ అభిమానులకు విజ్ఞప్తి చేశాడు. 

‘‘కొవిడ్‌ తర్వాత భారీ సంఖ్యలో ప్రేక్షకుల మధ్య ఆడుతున్న తొలి సీజన్‌ ఇదే కావడం విశేషం. అభిమానులు పెద్ద ఎత్తున తరలి వచ్చి మ్యాచ్‌లను వీక్షించేందుకు ఎదురు చూస్తున్నారు. ఇలాంటి స్టేడియాల్లో ఆడటం ఎప్పుడూ ఆనందంగా ఉంటుంది. అహ్మదాబాద్‌లోని నరేంద్ర మోదీ అతి పెద్ద మైదానంలో ఆడబోతుండటం మరింత ఉత్సాహంగా ఉంది. అయితే, గుజరాత్‌లోని సీఎస్‌కే అభిమానులకు ఓ విజ్ఞప్తి చేస్తున్నా. ప్రతి ఒక్కరూ వచ్చి   చెన్నైజట్టుకు మద్దతు ఇవ్వాలని కోరుకుంటున్నా. ఇక ఈ మైదానంలో ఇటీవలే ఆసీస్‌తో టెస్టు మ్యాచ్‌ ఆడిన అనుభవం ఉంది. అప్పుడు భారీగానే అభిమానులు మ్యాచ్‌ కోసం వచ్చారు. హోం గ్రౌండ్‌లో సొంత జట్టుకు మద్దతుగా  అభిమానులు వస్తుంటారు. అలా ఉండటం కూడా గర్వకారణం. అయితే, ఇప్పుడు ఈ మ్యాచ్‌కు మాత్రం గుజరాత్‌ అభిమానులు చెన్నై సూపర్ కింగ్స్‌కు సపోర్ట్‌ చేయాలని కోరుతున్నా’’ అని జడేజా తెలిపాడు. అయితే.. గుజరాత్‌తో తొలి మ్యాచ్‌లో కెప్టెన్ ఎంఎస్ ధోనీ ఆడటం ఇంకా అనుమానంగానే ఉంది. ధోనీ లేకపోతే.. జడ్డూ నాయకత్వం వహించే అవకాశం ఉంది.