IND vs SA: రాహుల్‌ ద్రవిడ్‌ చెప్పిందే ఫాలో అవుతున్నా: రింకు సింగ్‌

ఇంటర్నెట్ డెస్క్‌: ఆదివారం నుంచి భారత్ - దక్షిణాఫ్రికా (IND vs SA) జట్ల మధ్య టీ20 సిరీస్‌ ప్రారంభం కానుంది. ఇప్పుడందరి దృష్టి మిడిలార్డర్‌ బ్యాటర్‌ రింకు సింగ్‌పై ఉంది. నయా ఫినిషర్‌గా గుర్తింపు తెచ్చుకోవడానికి ప్రయత్నిస్తున్న అతడు ఆసీస్‌తో పొట్టి సిరీస్‌లో అదరగొట్టాడు. దక్షిణాఫ్రికా పర్యటనలోనూ కీలక పాత్ర పోషించేందుకు ఆత్రుతగా ఎదురు చూస్తున్నాడు. ఈ క్రమంలో టీమ్‌ఇండియా ప్రధాన కోచ్‌ రాహుల్‌ ద్రవిడ్‌ (Rahul Dravid) తనతో సంభాషించినట్లు రింకు సింగ్‌ (Rinku Singh) వెల్లడించాడు. రింకు సింగ్ ఐదు లేదా ఆరో స్థానంలో బ్యాటింగ్‌కు దిగే అవకాశం ఉంది. 

‘‘దక్షిణాఫ్రికాతో సిరీస్‌ కోసం ఆసక్తిగా ఎదురు చూస్తున్నా. మా తొలి ప్రాక్టీస్ సెషన్ అద్భుతంగా జరిగింది. వాతావరణం కూడా చాలా బాగుంది. రాహుల్‌ ద్రవిడ్‌తో పని చేసే అవకాశం రావడం అదృష్టం. మా మధ్య జరిగిన సంభాషణ సమయంలో ఒకే మాట చెప్పాడు. ‘సహజంగా నువ్వు ఎలా ఆడతావో అలానే షాట్లు కొట్టేయ్‌’ ఇదీ నాకు ఇచ్చిన సందేశం. ఐదు లేదా ఆరో స్థానంలో బ్యాటింగ్‌ చేయాల్సి ఉంటుందని కూడా సూచించాడు. అలాంటి స్థానంలో ఆడాలంటే సవాల్‌తో కూడుకున్నదే. ఏమాత్రం కుదురుకోవడానికి సమయం ఉండదు. అయితే వ్యక్తిగతంగా ఆత్మవిశ్వాసంతో ఉండాలని ద్రవిడ్‌ హితబోధ చేశాడు. 

నేను యూపీ తరఫున ఇదే స్థానంలో చాన్నాళ్లు ఆడా. నాకెంతో కలిసొచ్చిన స్థానం. నాలుగైదు వికెట్లు పడిన తర్వాత ఆడటమంటే ఎలాంటి బ్యాటర్‌కైనా కష్టమే. కానీ, దూకుడుగా ఆడటం చాలా ఇష్టం. దక్షిణాఫ్రికా సిరీస్‌లోనూ ఇదే ఫాలో అవుతా. ఇక జట్టులో రవి బిష్ణోయ్, అర్ష్‌దీప్‌, జితేశ్‌, అవేశ్‌ ఖాన్‌తో కంపెనీ చాలా బాగుంటుంది. మైదానం ఆవల కూడా ఒకరికొకరం కలిసిపోతాం. క్రికెట్‌లో ఇది చాలా ముఖ్యం. అలాగే ఫిట్‌నెస్‌ను కాపాడుకుంటూ ఉండాలి. దేశం కోసం చాలాకాలం ఆడాలంటే ఫిట్‌గా ఉండటం తప్పదు’’ అని రింకు సింగ్‌ తెలిపాడు.