RCBw Vs DCw: దంచికొట్టిన షఫాలీ వర్మ, మెగ్ లానింగ్‌.. ముంబయి రికార్డును బద్దలు కొట్టిన దిల్లీ

మహిళల ప్రీమియర్‌ లీగ్‌ (WPL 2023) తొలి సీజన్‌లో పురుషుల ఐపీఎల్ మాదిరిగానే పరుగుల వరద పారుతోంది. లీగ్‌ ఆరంభ మ్యాచ్‌లో ముంబయి ఇండియన్స్‌ 207 పరుగుల స్కోరు నమోదు చేయగా.. రెండో మ్యాచ్‌లోనే ఆ రికార్డును దిల్లీ బద్దలుకొట్టింది.

Updated : 05 Mar 2023 17:31 IST

ఇంటర్నెట్ డెస్క్: మహిళల ప్రీమియర్‌ లీగ్‌ (WPL 2023) తొలి సీజన్‌లో పురుషుల ఐపీఎల్ మాదిరిగానే పరుగుల వరద పారుతోంది. లీగ్‌ ఆరంభ మ్యాచ్‌లో ముంబయి ఇండియన్స్‌ 207 పరుగుల స్కోరు నమోదు చేయగా.. రెండో మ్యాచ్‌లోనే ఆ రికార్డును దిల్లీ బద్దలుకొట్టింది.  రాయల్ ఛాలెంజర్స్‌ బెంగళూరు (RCBw)తో జరుగుతున్న మ్యాచ్‌లో తొలుత బ్యాటింగ్‌ చేసిన దిల్లీ క్యాపిటల్స్‌ (DCw) నిర్ణీత 20 ఓవర్లలో రెండు వికెట్ల నష్టానికి 223 పరుగులు చేసింది. కెప్టెన్‌ మెగ్ లానింగ్‌  (72; 43 బంతుల్లో 14 ఫోర్లు), షఫాలీ వర్మ (84; 45 బంతుల్లో 10 ఫోర్లు, 4 సిక్స్‌లు) అర్ధ శతకాలతో విరుచుకుపడ్డారు. షఫాలీ 31 బంతుల్లో హాఫ్‌ సెంచరీ పూర్తి చేసుకోగా.. లానింగ్‌ 30 బంతుల్లోనే ఈ మార్క్‌ను అందుకుంది. బెంగళూరు బౌలర్లలో హీథర్‌ నైట్‌ రెండు వికెట్లు పడగొట్టింది. మిగతా బౌలర్లకు వికెట్లు దక్కలేదు.  

పోటాపోటీగా బౌండరీలు.. ఒకే ఓవర్‌లో ఔట్‌  

ఇన్నింగ్స్‌ ఆరంభం నుంచి షఫాలీ, మెగ్ లానింగ్‌ పోటాపోటీగా బౌండరీలు బాదారు. మెగన్ స్కట్ వేసిన రెండో ఓవర్‌లో లానింగ్‌ వరుసగా రెండు ఫోర్లు కొట్టగా.. ప్రీతి బోస్‌ వేసిన నాలుగో ఓవర్‌లో షఫాలీ ఓ సిక్సర్‌ బాదింది. సోఫీ డివైన్‌ వేసిన ఆరో ఓవర్‌లో చెరో రెండు బౌండరీలు బాదారు. ఆషా శోభన వేసిన తొమ్మిదో ఓవర్‌లో షఫాలీ రెండు సిక్స్‌లు, ఓ ఫోర్‌.. లానింగ్‌ ఓ ఫోర్‌ రాబట్టడంతో ఈ ఓవర్‌లో ఏకంగా 22 పరుగులొచ్చాయి. హీథర్‌ నైట్‌ వేసిన 11 ఓవర్‌లో మరో సిక్సర్‌ బాదిన షఫాలీ.. రేణుకా సింగ్‌ వేసిన తర్వాతి ఓవర్‌లో బంతిని మూడు సార్లు బౌండరీకి పంపింది.

వరుస బౌండరీలతో విరుచుకుపడుతూ శతకాల దిశగా సాగుతున్న ఈ ఇద్దరూ బ్యాటర్లను హీథర్‌ ఒకే ఓవర్‌లో ఔట్‌ చేసి బెంగళూరుకు ఉపశమనం అందించింది. లానింగ్ క్లీన్‌బౌల్డ్‌ కాగా.. షఫాలీ.. వికెట్‌ కీపర్‌ రిచా ఘోష్‌కు క్యాచ్‌ ఇచ్చి పెవిలియన్‌ చేరింది. ఆ తర్వాత మెరిజన్నే (39*; 17 బంతుల్లో 3 ఫోర్లు, 3 సిక్స్‌లు), జెమీమా రోడ్రిగ్స్‌ (22*; 15 బంతుల్లో 3 ఫోర్లు) కూడా రాణించడంతో దిల్లీ రికార్డు స్కోరు సాధించింది.

Tags :

Trending

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని