సెమీస్‌లో సాత్విక్‌ జోడీ

బ్యాంకాక్‌: థాయ్‌లాండ్‌ ఓపెన్‌ సూపర్‌ 500 బ్యాడ్మింటన్‌ టోర్నీలో భారత స్టార్‌ జోడీ సాత్విక్‌ సాయిరాజ్, చిరాగ్‌ శెట్టి సెమీఫైనల్‌కు దూసుకెళ్లింది. శుక్రవారం క్వార్టర్‌ఫైనల్లో ప్రపంచ నం.3 సాత్విక్‌ ద్వయం 21-7, 21-14తో జునైది ఆరిఫ్, రాయ్‌ కింగ్‌ (మలేసియా)ను ఓడించింది. మహిళల డబుల్స్‌లో అశ్విని పొన్నప్ప, తనీషా జంట పోరాడి గెలిచింది. మూడు గేమ్‌ల పాటు నువ్వా నేనా అన్నట్టుగా సాగిన క్వార్టర్స్‌లో అశ్విని జంట 21-15, 21-23, 21-19తో ఆరో సీడ్‌ లీ యు లిమ్, షెన్‌ సియుంగ్‌ (దక్షిణ కొరియా) జోడీపై విజయం సాధించింది. మరోవైపు పురుషుల సింగిల్స్‌లో మీరాబా లువాంగ్‌ మైసనాం పోరాటానికి తెరపడింది. మీరాబా 12-21, 5-21తో నాలుగో సీడ్‌ కున్లావత్‌ వితిసర్న్‌ (థాయ్‌లాండ్‌) చేతిలో పరాజయంపాలయ్యాడు.