T20 World Cup 2024: నమీబియాపై స్కాట్లాండ్‌ పైచేయి

బ్రిడ్జ్‌టౌన్‌: టీ20 ప్రపంచకప్‌లో స్కాట్లాండ్‌ గెలుపు బోణీ కొట్టింది. ఇంగ్లాండ్‌తో గత మ్యాచ్‌ వర్షం కారణంగా రద్దవడంతో పాయింట్లు పంచుకున్న స్కాట్లాండ్‌.. ఈసారి పూర్తి పాయింట్లను ఖాతాలో వేసుకుంది. గ్రూప్‌-బి పోరులో స్కాట్లాండ్‌ 5 వికెట్ల తేడాతో నమీబియాను ఓడించింది. మొదట నమీబియా 9 వికెట్లకు 155 పరుగులు చేసింది. గెరార్డ్‌ ఎరాస్మస్‌ (52; 31 బంతుల్లో 5×4, 2×6) టాప్‌ స్కోరర్‌. వీల్‌ (3/33), క్యూరీ (2/16), లీస్క్‌ (1/16) ప్రత్యర్థిని కట్టడి చేశారు. ఛేదనలో రిచీ బారింగ్టన్‌ (47; 35 బంతుల్లో 2×4, 2×6), లీస్క్‌ (35; 17 బంతుల్లో 4×6) సత్తా చాటడంతో లక్ష్యాన్ని స్కాట్లాండ్‌ 18.3 ఓవర్లలో 5 వికెట్లే కోల్పోయి అందుకుంది.

మెరిసిన బారింగ్టన్, లీస్క్‌: ఛేదనలో నమీబియా బౌలర్లు కట్టుదిట్టంగా బంతులు వేయడంతో స్కాట్లాండ్‌ 5 ఓవర్లకు 25/1తో నిలిచింది. ఈ స్థితిలో మైకేల్‌ జోన్స్‌ (26) దూకుడుగా ఆడి స్కోరు పెంచాడు. అతడు ఔటయ్యాక స్కాట్లాండ్‌ మళ్లీ వెనుకబడింది. 12 ఓవర్లకు 78/4తో ఇబ్బందుల్లో చిక్కుకుంది. ఈ స్థితిలో రిచీ బారింగ్టన్, లీస్క్‌ జట్టును ఆదుకున్నారు. 24 బంతుల్లో 40 పరుగులు అవసరమైన స్థితిలో వీజ్‌ బౌలింగ్‌లో లీస్క్‌ రెండు సిక్స్‌లు, ఫోర్‌ బాదడంతో సమీకరణం (18 బంతుల్లో 21) తేలికైపోయింది. ఆ తర్వాత నమీబియా గెలుపు లాంఛనమే అయింది. 

నమీబియా: 155/9 (ఎరాస్మస్‌ 52, గ్రీన్‌ 28, డావిన్‌ 20; వీల్‌ 3/33, క్యూరీ 2/16, లీస్క్‌ 1/16, సోల్‌ 1/16, గ్రెవ్స్‌ 1/24) స్కాట్లాండ్‌: 18.3 ఓవర్లలో 157/5 (బారింగ్టన్‌ 47, మైకేల్‌ లీస్క్‌ 35, జోన్స్‌ 26)