Virat Kohli: కోహ్లీ ‘18’ స్పెషల్‌.. ఆ నంబర్‌తో అనుబంధం కొనసాగుతోందిలా..

ఇంటర్నెట్‌ డెస్క్‌ : పరుగుల వీరుడు విరాట్‌ కోహ్లీ.. ఐపీఎల్‌లో తన సెంచరీ దాహాన్ని నాలుగేళ్ల తర్వాత తీర్చుకున్నాడు. గురువారం సన్‌రైజర్స్‌పై అద్భుత శతకాన్ని(100; 63 బంతుల్లో 12×4, 4×6) బాది.. మొత్తం ఆరు శతకాలతో గేల్‌ రికార్డును విరాట్‌ సమం చేశాడు. అయితే ఈ శతకం బాదింది మే 18న. ఈ నేపథ్యంలో ‘18’ నంబర్‌తో తనకున్న అనుబంధాన్ని తాజాగా విరాట్‌ మరోసారి బయటపెట్టాడు.

‘నిజాయతీగా చెప్పాలంటే.. అండర్‌ 19 క్రికెట్‌ ఆడేటప్పుడు నా పేరుపై ఆ నంబర్‌తో జెర్సీ ఇచ్చారు. అయితే.. ఆ తర్వాత ఈ నంబర్‌ నా జీవితంలో ప్రత్యేకంగా మారింది. నేను క్రికెట్‌లో అరంగేట్రం చేసింది 18 ఆగస్టు. నా తండ్రి చనిపోయింది 18 డిసెంబర్‌. నా జీవితంలో రెండు ముఖ్యమైన క్షణాలు ఈ రోజునే జరిగాయి’ అని కోహ్లీ ఓ క్రీడా ఛానల్‌తో మాట్లాడుతూ భావోద్వేగానికి గురయ్యాడు.

ఇక 18 నంబర్‌తో కోహ్లీ అనుబంధం కొనసాగుతుందిలా..

• కోహ్లీ (Virat Kohli ) పేరు వినగానే.. క్రికెట్‌ అభిమానులకు ‘జెర్సీ నంబరు 18 (jersey Number 18)’ కళ్ల ముందు కదలాడుతుంది. అది ఐపీఎల్‌ అయినా.. అంతర్జాతీయ టోర్నీ అయినా కోహ్లీ ఆ జెర్సీ నంబరులోనే కన్పిస్తాడు.
• కోహ్లీ ఐపీఎల్‌లో ఆరో శతకం బాదింది మే 18 2023న. అదీ ‘18’వ ఓవర్‌లో భువనేశ్వర్‌ బౌలింగ్‌లో సిక్స్‌ బాది చేరుకోవడం.
• ఇక కోహ్లీ తన రెండో ఐపీఎల్‌ సెంచరీ కొట్టింది కూడా మే 18 నాడే. 2016లో పంజాబ్‌పై చిన్నస్వామి స్టేడియంలో కోహ్లీ 113 పరుగులు చేశాడు. ఇదే విరాట్‌కు ఐపీఎల్‌లో అత్యుత్తమ స్కోరు.
• కోహ్లీ అంతర్జాతీయ క్రికెట్‌లో అరంగేట్రం చేసి తొలి వన్డే ఆడింది 18 ఆగస్టు 2008లో.
• ఇక చిరకాల ప్రత్యర్థి పాకిస్థాన్‌పై కోహ్లీ సెంచరీ నమోదు చేసింది కూడా 18వ తేదీనే. 2012 మార్చి 18న ఢాకాలో పాకిస్థాన్‌పై జరిగిన వన్డేలో విరాట్‌ 183 పరుగులు చేశాడు. ఇదే కోహ్లీకిప్పటికీ వన్డేల్లో అత్యధిక స్కోరు.
• కోహ్లీ టెస్టుల్లో రెండు శతకాలను ఇదే తేదీన బాదాడు. 18 ఆగస్టు 2018లో ఇంగ్లాండ్‌పై 103 పరుగులు చేయగా.. 2013 డిసెంబర్‌ 18న దక్షిణాఫ్రికాపై 119 పరుగులు చేశాడు.
• కోహ్లీ (Virat Kohli ) 17 ఏళ్ల వయసులో అతడి తండ్రి ప్రేమ్‌ కోహ్లీ 2006 డిసెంబరు 18వ తేదీ తెల్లవారుజామున గుండెపోటుతో మరణించారు. ఆ సమయంలో దిల్లీ తరఫున కర్ణాటకతో కోహ్లీ ఓ రంజీ మ్యాచ్‌ ఆడుతున్నాడు. ఓ పక్క తండ్రి మరణించినా.. కుటుంబ సభ్యులు అండగా నిలవడంతో దుఃఖాన్ని దిగమింగుకుని మైదానానికి వెళ్లాడు. ఆ రోజు మ్యాచ్‌లో ఏకంగా 90 పరుగులు చేశాడు. ఆ రోజు మ్యాచ్‌ ముగిశాక తండ్రి అంత్యక్రియల్లో పాల్గొన్నాడు. తండ్రి మరణం తర్వాత మ్యాచ్‌ ఆడటంపై కోహ్లీ స్పందిస్తూ.. ఆ క్షణం తాను వ్యక్తిగా మారానని, కఠిన నిర్ణయం తీసుకున్నానని నాటి రోజుల్ని గుర్తుచేసుకున్నాడు.
• ఈ నంబరుకు మరో ప్రత్యేకత కూడా ఉంది. కోహ్లీ తండ్రి ప్రేమ్‌ కూడా క్రికెట్‌ ఆడే రోజుల్లో జెర్సీ నంబరు 18నే వేసుకున్నారు. ఆయన జ్ఞాపకార్థం కోహ్లీ కూడా అదే నంబరుతో కన్పిస్తున్నాడు.