Virat Kohli: రిటైరైతే కనపడను..

బెంగళూరు: క్రికెట్లో ఉన్నంత కాలం శక్తినంతా ధార పోస్తానని, ఒక్కసారి రిటైరైతే కొంతకాలం ఎవరికీ కనపడనని కింగ్‌ కోహ్లి అన్నాడు. ఐపీఎల్‌లో జోరుమీదున్న కోహ్లి ఇప్పటివరకు బెంగళూరు తరఫున 13 మ్యాచ్‌ల్లో 661 పరుగులు చేశాడు. టోర్నీ టాప్‌ స్కోరర్‌ అతడే. పశ్చాత్తాప రహితంగా జీవించాలన్న తపనే తనను నడిపిస్తోందని సోషల్‌ మీడియాలో ఆర్సీబీ పోస్ట్‌ చేసిన వీడియోలో కోహ్లి చెప్పాడు. ‘‘ఏ పనినైనా అసంపూర్తిగా వదిలేసి తర్వాత బాధపడకూడదు. నాకా పరిస్థితి రాదని కచ్చితంగా చెప్పగలను. ఒక్కసారి రిటైరయ్యానంటే మళ్లీ కనపడను. కొంతకాలం మీరు నన్ను చూడలేరు. అందుకే ఆటలో కొనసాగినంత కాలం సర్వశక్తులూ ఒడ్డుతా. నన్ను నడిపించేది అదే’’ అని అన్నాడు. కెప్టెన్‌గా 2008 అండర్‌-19 ప్రపంచకప్‌లో భారత జట్టును విజేతగా నిలిపిన తర్వాత కోహ్లిని ఆర్సీబీ జట్టులోకి తీసుకుంది. అప్పటి నుంచి అతడు ఆ ఫ్రాంఛైజీతోనే కొనసాగుతున్నాడు.